کراچی : پنی آ عالم دین و کراچی ٹی الیوسف اسلامک اکیڈمی نا راہشون مولانا عبدالسلام عارف تون بلوچ یکجہتی کمیٹی نا دیوان ئس مس اراٹی بلوچ قوم ئنا نسل کُشی و زوراکی ئٹ بیگواہی تہ رد ئٹ بلوچ عالم آتا کردار و اُمیت آتا بابت ئٹ شابیتی رد ئٹ ہیت کننگا ۔
دا دیوان لیاری نا محلہ غریب شاہ ئٹی اڈ تننگ مس ۔ ارانا مہمانداری ئے بی وائی سی نا راہشون لالا عبدالوہاب کرے اراٹی بی وائی سی گْوادر نا باسک عبداللہ بلوچ و بندغی حق آتا مُسکوہی باسک زاہد بگٹی ہم اوار ئس۔
دیوان ئٹی بشخ ہلوک آک پاریر کہ بلوچ مذہبی راہشون آتون دا تقاضہ ءِ کہ او ہر پلیٹ فارم آ بلوچ نسل کُشی و زوراکی ئٹ بیگواہی تہ توار بُڑز کیر ۔ او پاکستان نا کُل مدرسہ تیٹی دا ظلم ئنا برخلاف آ راہ سازی کن تینا کردئے ادا کیر و اوفتے پار کہ بلوچستان ئٹی بندغی حق آتا خلاف ورزی مننگءِ و بندغ آتے خلنگءُ۔
پروگِرام ئٹی تولوک آک مولانا عبدالسلام عارف نا کردار نا تعریف ئے کرِسا پاریر کہ مولانا عبدالسلام عارف کراچی ٹی بلوچ نسل کُشی نا برخلاف آ اسہ بھلو توار ئسے ۔ نن بروک آ وخت آ اُمیت کینہ کہ او ہر وخت آ ننا کاروان نا بشخ مرو ۔
