بلوچستان نا شہر حب چوکی لس گچین کاری حلقہ پی بی 21 نا نتائج آتا اِرا سیاسی ٹولی تیٹی جنگ ئنا سوب آن نن ئٹ سُمکاری و جھڑپ آتا سلسلہ برجا مس ۔
حب حلقہ پی بی 21 آن پیپلز پارٹی نا علی حسن زہری و بھوتانی ٹولی مون پہ مون مسُر ہرانگا ہڑتومکا امیدوار آک سر سُہب مننگ نا دعویٰ کننگءُ ۔
ہڑتومکا ٹولی تیٹ سُمکاری نا سلسلہ آر او دفتر سوک سینٹر نا خُڑک آ مس ، ووٹ آتا پدا حسابی نا معاملہ آ حالیت آک خراب مسُر ، ہراڈے پدا لشکری بندغ آک ہند ئنا کنٹر تے سنبھالار ۔
ٹولی تہ نیامٹ سُمکاری نا سوب آن اِرا بندغ خلنگار و یانزدہ بندغ ٹپی مسُر ہرافتے سول اسپتال حب آ سر کریر ۔
خلنگ مروکا تیٹ بھوتانی گروپ نا سکندر چھٹہ و اَسہ پین بندغ ئس تُدءِ ۔
یاتی مرے کے بلوچستان نا ایلو ہند آتا وڑ حب ئٹی ہم ہنوکا کیہی دے تیان مرکزی کسر ئے بند کرینو ، ہرانا سوب آن ہزارہ مسافر و مال بردار لاریک پھسینگانو ۔
