سبی آن پاکستانی لشکر اِرا بندغ آتے زوراکی ئٹ بیگواہ کرے ہرافتیٹی اسٹ نا باوہ چاردہ سال مُست بیگواہ کننگانءِ۔
حوال آتا رد ئٹ پاکستانی لشکر خادم حسین ولد مزار خان مری و فیض محمد ولد جلاؤ مری جھالڑی سبی نا ہندی ئے 06 فروری 2024 آ ٹیپل نا ٹک آن ہمو وخت زوراکی ئٹ بیگواہ کننگا ہرا وخت او سبی آن لاری ٹی سفر کننگ ئس۔
بیگواہ آ خادم حسین نا باوہ مزار خان مری ہم تدوکا 14 سال آتیان بیگواہءِ۔
حاجی مزار خان ولد گہرام ئے 28 مئی 2010 آ پین چار بندغ آتا اواری ئٹ زوراکی ئٹ بیگواہ کننگاسس۔ مزار خان نا خاوت نا رد ئٹ اودے سبی نا ہند جھالڑی آن لشکر لشکری نا وخت آ دزگیر کننگاسس۔
مزار خان نا خاوت اونا آجوئی کن توار بُڑز کننگ ئس کہ داسا مزار خان نا چُنائے ہم پاکستانی لشکر زوراکی ئٹ بیگواہ کرینے۔
