بولان نا علاقہ مچھ ئٹی تدوکا دے تیٹ دروغ ئنا مونتس ئٹ کسفنگوک بندغ آتیان اسٹ نا چاہنداری دائسکان مننگ کتنے۔
سول اسپتال کوئٹہ ٹی تخنگوک جون ئنا خاہوت نا دائسکان سماء تمتنے۔
پاکستانی کوالخواک مچھ جلہو نا اِرا دے آن گڈ دعویٰ کریسر کہ جھڑپ آتیٹ خلنگوک پنچ بندغ نا جونک رسینگانو واہم تدوکا دے تیٹ پن کروک پنچ بندغ نا جون تیٹ چار ئنا چاہنداری زوراکی ئٹ بیگواہ کننگوک بندغ آتیان مس۔
دا بارو ئٹ بلوچ یکجہتی کمیٹی سول اسپتال کوئٹہ آن میڈیا ئے بریفنگ تریسہ پارے کہ پن کروک جونک بیگواہ کننگعک بندغ آتا اسر ہرافتا پِنک ننا لسٹ آتیٹ اسر۔
مچھ تدینی آن گڈ دا وخت پنچ اندنو بندغ نا جون ہتنگانے ہرافتیٹ چھار بندغ نا جون تا چاہنداری ئے اوفتا خاہوت آک کرینو ہرا مالو آن ریاستی ادارہ آتا دوتیان زوراکی ئٹ بیگواہ کننگاسر۔
تنظیم نا ردئٹ ہرا چھار جون تا چاہنداری کننگانے اوفتیٹ بشیر احمد مری ولد حاجی خان و ارمان مری ولد نہال خان مری ہرافتے 2 جولائی 2023 آ زوراکی ئٹ بیگواہ کریسر ہرافتا خاہوت آک اسلام آباد برانز ٹی اوار مریسہ اوفتا آجو کننگ نا خواست کریسر و چارمی جون نا چاہنداری شکیل احمد ولد محمد رمضان ہند زہری آن مسنے ہرانا خاہوت نا ردئٹ اودے 4 جون 2023 آ زوراکی ئٹ بیگواہ کننگاسس۔
بی وائی سی پریس کانفرنس ئٹی پارے کہ مچھ جلہو آن گڈ زوراکی ئٹ بیگواہ بندغ تے دروغ نا مونتس ئٹ کسفنگا ریاست سلہہ بند بندغ تا کاروائی ئے جواز جوڑ کریسہ بیگواہ بندغ تے کسفیسہ بے بندغی کاریم کننگ ءِ۔ ریاست اسہ دروغ بیانیہ ئسے آ بلوچ نسل کشی ئے برجاء تخانے۔
