بلوچ راجی آجوئی سنگر (براس) ئنا جارکش بلوچ خان میڈیا ٹی تینا شنگ مروکو درشان ئسیٹی پارے کہ براس ئنا سرمچار آک گوادر، بلیدہ، پنجگور، خضدار، حب، خاران و نوشکی ٹی قوضہ گیر پاکستانی لشکر و پن ئنا گچین کاری دفتر تے جتا وڑ ئنا 15 جلہو تیٹ نشانہ کرینو۔
او مونی پارے کہ براس ئنا سرمچار آک 4 فروری دو بجہ نا وخت آ گوادر نا ہند نلینٹ ئٹی نلانی نا ہند آ قوضہ گیر پاکستانی لشکر نا اسہ لاری ئسے ریموٹ کنٹرول آئی ای ڈی جلہو ئسیٹی نشانہ کریر، تراک ئٹی پاکستانی لشکر نا کیہی کارندہ آک مرگ ئنا گواچی و ٹپی مسر۔ دشمن لشکر تینا نسخان تے ڈھکنگ نا کوشست کریر ہندُن کہ ساندہ کرسا بسُنے۔
او پارے کہ اسہ پین کارروائی سیٹی براس ئنا سرمچار آک 2 فروری نا نن بلیدہ نا ہند گِلی ٹی قوضہ گیر پاکستانی لشکر نا اسہ پوسٹ ئسے آ اِرا کنڈ آن جلہو کریر، سرمچار آک دشمن لشکر آ راکٹ و گرنیڈ لانچر ئٹ کیہی گولہ خلکُر و بھلا سلاہ تیٹ ہم نشانہ کریر۔ جلہو ئٹ دشمن لشکرئے بھاز جانی و مالی نسخان ہرفوئی تما۔
جارکش پارے کہ درے ننکان سرمچار آک آواران نا علاقہ پیرندر ڈھل بیدی و حسن گوٹھ ئٹی نیشنل پارٹی نا سروک میر یعقوب قمبرانی نا اُراغہ چغلی بمب ئٹ جلہو کریر، یانزدہ بجہ نا وخت آ میر غفور نا اُرائے ہم چغلی بمب ئٹ ٹک کریر۔
او پارے کہ دا بندغ آتے مُست پاننگانے کہ پن ئنا گچین کاری مہم تیان پد مریر، دا جلہو تے ہم اوفتے خبڑدار کننگ کن کرینن، ہراٹی جانی نسخان تننگ آن احتیاط کننگانے۔
جارکش پارے کہ سرمچار آک 5 فروری آ ہیرونک ئٹی قوضہ گیر پاکستانی لشکر نا چیک پوسٹ آ گرنیڈ لانچر ئٹ کیہی گولہ خسار و دشمن ئے جانی و مالی نسخان تسر۔
او پارے کہ براس ئنا سرمچار آک 2 فروری آ پنجگور شہر ئٹ پن ئنا پاکستانی گچین کاری امیت وار و مسکوہی وزیر رحمت صالح نا جاگہ، 4 فروری آ گچین کاری امیت وار حاجی اسلام نا جاگہ، 5 فروری آ خدابادان ئٹی گچین کاری امیت وار و مسکوہی پاکستانی وزیر اسد بلوچ و تسپ ئٹی حاجی عطاء اللہ نا گچین کاری دفترئے گرنیڈ لانچر ئٹ گولہ خسِسہ ٹک کریر۔
او پارے کہ براس ئنا سرمچار آک 5 فروری آ حب شہر ئٹ پیپلز پارٹی نا انتخابی دفترئے چغلی بمب ئٹ نشانہ کریر۔
او مُستی پارے کہ سرمچار آک 5 فروری آ پین اِرا کارروائی تیٹی خاران شار ئٹ واپڈا کالونی ٹی واپڈا آفس نا پولنگ اسٹیشن و گرلز سیکنڈری اسکول نا پولنگ اسٹیشن ئے چغلی بمب ئٹ ٹک کریر۔ ہندُن 5 فروری نا نن نوشکی شار ئٹ الیکشن کمیشن نا دفترئے آئی ای ڈی جلہو ٹی نشانہ کننگا، تراک ئٹ دفترئے نسخان ہم مس۔
جارکش پارے کہ براس ئنا سرمچار آک 5 فروری آ گریشہ سریج ئٹی الیکشن کمیشن نا دفترئے چغلی بمب ئٹ نشانہ کریر۔ اسہ کارروائی ئسیٹی 5 فروری نا نن گریشگ سریج ئٹی پاکستانی لشکر نا چیک پوسٹ ئے سلاہ بند جلہو ئٹ نشانہ کننگا ہراٹی دشمن لشکرئے جانی و مالی نسخان ہرفوئی تما۔
بلوچ خان ایسر ئٹ پارے کہ پن ئنا گچین کاری مہم آتیا ننا جلہو آک برجاء مرور۔ نن الس آن خواست کینہ کہ او گچین کاری دفتر و امیت وار تیان رکھوک مُری آ مریر۔ براس ئنا سرمچار آک جانی نسخان تے کم کننگ کن رکھوک وڑ ئٹ کارروائی کننگ ءُ واہم نن پاش پانہ کہ ننا کارروائیک داسا ترُند مرور۔
