شال سول اسپتال، پولیس لخاہوت آتے جون تے تننگ آن نمن کرے، بلوچ یکجہتی کمیٹی نا سروک رہنما ماہ رنگ بلوچ پولیس تون تران ئٹ بےسوب مننگ آن گڈ برانز نا پڑو کرے، ہراکان گڈ بیگواہ غا بندغ آتا خاہوت آتون اوار برانز کن مخلوق سول اسپتال آ سر مس ہراکان گڈ پولیس و سول اسپتال نا بست و بند بیوس مرسا مچھ ئٹ دروغ ئنا مونتس ئٹ شہید کروک بندغ آتا جون تے اوفتا خاہوت آتے تس۔
دا وختا ڈاکٹر ماہ رنگ بلوچ پولیس آن سوج کرے کہ نم ارا بنیات آ دروغ ئنا مونتس ئٹ خلنگوک بندغ آتا خاہوت آتان دستخط ہلِسہ اوفتے دہشتگرد پاننگ نا کوشست کننگ ارے۔؟ وختس کہ دا بیگواہ اسر، تو تینا کاغذ ءِ بدل کرسا لکھبو کہ دا بیگواہ اسر و دا راستکی ءِ کس مٹ کننگ کپک۔
نمے سما ءِ کہ شال سول اسپتال ئٹی تدوکا دے 6 بندغ نا جون تے ہتنگاسس ہرافتان چھار ہنا چاہنداری مُست آن فورسز آتا دو آن زوراکی ئٹ بیگواہ کننگوک بندغ آتا پنا مسنے، ہرافتان بشیر احمد مری ولد حاجی خان و ارمان مری ولد نہال خان مری ہرافتی 2 جولائی 2023 آ زوراکی ئٹ بیگواہ کننگاسس و صوبیدار ولد گلزار خان ہرنائی بازار آن 9 ستمبر 2023 آ زوراکی ئٹ بیگواہ کننگاسس۔ ہرافتا خاہوت آک ہم اسلام آباد تولوک برانز ئٹ اوار اسر۔
چھارمیکو جون ئنا چاہنداری شکیل احمد ولد محمد رمضان سکنہ زہری نا پنا مسنے ہرا نا خاہوت نا رد ئٹ اودے 4 جون 2023 آ زوراکی ئٹ بیگواہ کننگاسس۔
