بلوچستان نا ضلع کیچ ئنا بنجائی شار تربت ئٹی ڈی بلوچ نا ہند آ تولوک برانز کروکا خاؤت آک پریس کانفرنس ئس کرسا پاریر کہ نن تدوکا اِرا دے آن داڑے تینا سادہ غا خواست یعنی تینا بندغ آتا آجوئی کن تولوک اُن، ننتو دا برانز ئٹ چُنا و پیر زال تتون اوار بھلو کچ ئسیٹی بندغ آک اواع مسنو۔ مُد ئنا خرابی و ترند پِر مننگ آن بیدس ہم نن تینا برانز ءِ برجاء تخانن و ہرا نا اول و آخر خواست تینا بندغ آتا آجوئی ءِ۔
او پاریر کہ نن ریاست ءِ پاننگ خواہنہ کہ بلوچ ایڑ لمّہ غاک تینا بندغ آتا زوراکی نا بیگواہی تیان تنگ بسنو و ذہنی ناجوڑی تا گواچی مننگ ءُ۔ نن ریاستی راہبند و قانود نا رد ئٹ پرامن وڑ ئٹ ریاستی راہبند و قانود نا بالادستی نا ہیت کینہ۔ اگہ ریاست پُہہ مریک کہ ننا بندغ آک ڈوہدار ءُ تو اوفتے سزا تننگ کن ریاست تینا عدالت آتیٹ ہتے تاکہ عدالت آتیٹ اوفتے سزا تننگ مرے ولے دا وڑ کس ءِ بیگواہ کننگ بندغی حق آتا سخت لتاڑ ءِ۔
او پاریر کہ ہرا وخت آن بلوچستان ئٹی بیگواہ غا بندغ آتے فیک انکاؤنٹر آتیٹ خلنگ نا لڑ بناء مسنے داڑان بیگواہ غا بندغ آتا خاؤت آتا نیام ئٹ اسہ فریشانی ئس ودی مسنے و ہر اسٹ دا خلیس ئٹ زندہ ءِ کہ اوفتا بندغ آتے ہم دروغ ئنا مونتس آتیٹ خون کننگ مف۔ دا خلیس آن ایڑ لمّہ غاک ذہنی شل مسنو۔ دا زوت دے تیٹ ہرا وڑ بیگواہ غا بندغ آتے دروغ ئنا مونتس آتیٹ خون کننگانے ننے خلیس ءِ کہ ننا بندغ آتے اندا وڑ خون کننگ مف اندا سوب آن نن دنو گھام ارفنگ آ بیوس مسونن۔ ننتو برانز آن بیدس پین ہچ کسر اف۔
او ودیک پاریر کہ ننا علاقہ آن دا وخت شش بندغ ہرافتیٹ عابد وشدل و جہانزیب فضل ئے 21 مارچ 2023 وعدیل اقبال ئے 8 مارچ، شعیب لیاقت و حماد ئے 9 اپریل و ظریف ئے 9 اگست 2023 آ زوراکی ئٹ بیگواہ کننگانے۔ نن تینا بندغ آتا آجوئی کن برانز آتیان ہلیس کُل جمہوری و آئینی گھام ہرفینن بد بختی ئٹ ننے کس بنتو ہراکان گڈ نن بیوس مرسا ڈی بلوچ ئے بند کرین۔ و اگہ ننا خواست آتیا سوبری ئٹ عمل متو تو تیبہ کیچ ئٹ شاٹ کسر تے ہم بند کرون۔ نن ریاست آن آئینی و قانودی حق خواہنگ اُن ہرا ننا حق ءِ۔ نن تینا بندغ آتا آجوئی اسکان برانز برجاء تخون۔
