بلوچستان نا ضلع کیچ ئنا ہند سامی ٹی ہنوکا ہفتہ آن برجاء اِنگا بیگواہ بندغ آ تیکن برانز ئنا برانزی تے پاکستانی لشکر و انتظامیہ لاٹھی چارج و تشدد نا گواچی کرے۔ ہراڑان زالبول و چُناک ٹپی مسُر ۔
ہنوکا شام کمشنر مکُران سامی ٹی سی پیک کسر آ برانز آ تولوک واحد بخش نا خاوت تون مزاکرات نا کوشست کرے و شام چار بجہ آ زالبول و چُناتے آ لاٹھی چارج و نرینہ تے دزگیر کننگ نا کوشست کننگا ۔
تیوعہ شام پِر و تیز اِنگا تہو تان پد ہم بیگواہ آبندغ آ تا آجو مننگ نا برخلاف برانز برجاء ءِ ۔ زالبول و چُناک یخ ٹی شام بے یارو مددگار تولوک ءُ ۔
ہندی تہ رد ئٹ ہنوکا شام 2 فروری 2024 آ سامی برانز ئنا چارمیکو دے ڈی سی کیچ حسین نا بھلُنی ٹی ضلعی انتظامیہ نا اَسہ وفد ئس سامی بلوچی بازار سی پیک کسر آ برانز جاگہ آ مذاکرات کن ہناسس ۔
یعقوب جوسکی نا بھلُنی ٹی برانزی و انتظامیہ نا نیامٹ مزاکرات طے کننگار کہ برانزیک تینا اَسہ وفد ئس ڈی سی آفس آ گدریر ۔
مذاکرات ئٹی فیصلہ کننگا کہ المی کاغذی کاروائی آن پد واحدبخش ولد پیر محمد بلوچ ئے وفد نا حوالہ کننگ نا کوشست کننگءُ ۔
ولے ایلو نیمہ آ برانزیک دا فیصلہ ئے کرینو کہ ہراوخت اسکان واحد بخش ولد پیر محمد آجو کننگ متنے برانز برجاء مرو۔
بیگواہ آ واحد بخش نا خاوت نا نیمہ آن برانز برجا تخنگ آ سول انتظامیہ سیکورٹی فورسز تون اوار برانزی تیا لاٹھی چارج کرے ، زالبول و چُنا تے تشدد نا نشانہ کریر ہراڑان کیہی زالبول و چُناک ٹپی مسُر ہرافتیٹی پیرو زالبول ہم اوار ءُ ۔برانز ئٹی اوار نرینہ آتے دزگیر کننگ نا کوشست ہم کننگا ۔
برانزی تہ پاننگ ءِ کہ اوفتے حراساں کرینو و اوفتا پُچ آتے ہرانو ۔
یاتی مرے کہ ضلع کیچ نا سی پیک کسر نا اِرا اہم ءُ ہند سامی و تُربَت ئٹی بیگواہ مروکا بندغ آ تا خاوت آک تینا بندغ آتا آجوئی کن برانز آ تولوک ءُ ۔
تربت ئٹی سی پیک روٹ ڈی بلوچ نا ہند آ بیگواہ آ عابد وشدل ، جہانزیب فضل ،عدیل اقبال ، شعیب لیاقت ،حماد ، ظریف نا آجوئی کن مُسہ دے آن برانز برجاء ءِ ، سامی ٹی سی پیک کسر آ ایم ایٹ نا ہند آ شست سالی آ واحد بخش نا آجوئی کن خاوت ہنوکا ہفتہ سیان برانز آ تولوکءِ ۔
