شہدائے آپریشن درہِ بولان نا لازوال آ قربانیک تاریخ ئٹی زندہ رہینگرہ۔ بی ایل اے

بلوچ لبریشن آرمی نا جارکش جیئند بلوچ میڈیا ٹی شنگ مروکو درشان ئسیٹی آپریشن درہِ بولان ئٹی 13 بلوچ سرمچار آک دلیری و جُرت نا اسِہ عظیم ءُ مثال ئس جوڑسا، تینے قربان کرسا دا آپریشن ئے سرسہب کننگ ئٹی بھلا کردارئے ادا کریر۔ شھید سرمچار آتیٹی 12 سرمچار بی ایل اے مجید برگیڈ نا فدائی اسُر۔ اسِٹ بی ایل اے نا اول دستہ فتح اسکواڈ نا تربیت یافتہ کمانڈوس اسک۔ 13 شہید مروکاتہ تفصیل آک:۔

1۔ شھید فدائی عطاء بلوچ عرف شیخ گزگ ولد محمد، تربت ہیرونک نا ہندی ئس اسک۔ او 2016 آن بلوچ راجی جُہد ئٹی اوار مس، ہشت سال ئٹی دلیری و جرت ئٹ تینا راجی فرض ئے ایمانداری ئٹ ادا کرے۔ سلاہ بند جُہد آن مُست او بی ایس او نا پلیٹ فارم آن راجی غلامی نا برخلاف جُہد کننگ ئس۔ شھید عطاء بلوچ 2019 ٹی بی ایل اےمجید برگیڈ ٹی بطور رضاکار تینا خدمت آتے پیش کرے۔ او راجی آجوئی نا جُہد ئنا اسِہ تربیت یافتہ ءُ سرمچار ئس اسک۔ اونا فوجی صلاحیت آتا سوب آن اودے بی ایل اے نا کیمپ ئسینا ٹریننگ نا ذمہ واری تنگاسس۔ او بھلو وخت ئسیٹ جوانی ئٹ تینا کاریم ئے کرسہ مسُنے۔ آپریشن درہِ بولان نا وخت آ او مجید برگیڈ نا آپریشن کمانڈر ئس۔ او بلوچی زبان نا جوانو شاعرس ہم ئس۔ شہید عطاء بلوچ عرف شیخ گزگ نا اِرا سالُم تے پاکستانی لشکر شہید کرینے۔ شھید نا باوہ و اِلہ ئے کیہی سال مریک کہ انگہ بیگواہ ءُ۔

2۔ شہید فدائی جمال عرف کمبر مھروان ولد عبدالمجید، آواران نا ہند جھاؤ کوہڑو نا ہندی ئس اسک۔ او اسِہ تعلیم یافتہ ءُ ورناس ئس۔ او یونیورسٹی آن تینا گریجویشن ئے پورو کریسس۔ جمال بلوچ 2009 آ خواننگ نا وخت آ بی ایس او نا اسِہ باسک ئس اسک۔ او 2015 آ بلوچ راجی آجوئی نا سلاہ بند محاذ ئٹی اوار مس۔ او غیر معمولی صلاحیت آتا مالک اسک، او گوریلا سپاہی، سیاسی و نظریاتی باسک ئس اسک ۔ او ارِا سال مُست بی ایل اے مجید برگیڈ ئٹی تینا خدمت آتے پیش کرے، او جوانی ئٹ تینا فدائی ٹریننگ ئے پورو کرے۔ او آپریشن درہِ بولان نا وخت آ اسِہ سخت ءُ سنگر ئس توریسس۔ او تینا گُڈی سُم و گڈی ساہ اسکان تینا سنگر ئے دشمن نا دوٹی تتو۔

3۔ شہید فدائی سنگت فاروق بلوچ عرف چاکر ولد سید، تربت نا ہند آبسر نا ہندی ئس اسک۔ او یونیورسٹی آن گریجویشن تون اوار اسہ کتب بین ئس اسک۔ شہید فاروق بلوچ 2021 ٹی بلوچ راجی آجوئی نا جُہد ئٹی اوار مس، مجید برگیڈ ئٹی تینا خدمت آتے پیش کرے۔ اونا کڑد آپریشن درہِ بولان ئٹی اہم اسک۔ او بارود آن لوڈ اِنگا لاری ئے ایف سی ہیڈ کوارٹر مچھ ئنا دروازہ ٹی خلک، ہراڑان نہ بیرہ کیہی دشمن نا کارندہ آک خلنگار بلکہ مجید برگیڈ نا فدائی تے کیمپ ئٹی ہننگ کِن کسر مِلا۔

4۔ شہید فدائی سلال بلوچ عرف شئے مرید ابن نوربی بی 2019 ٹی بلوچ راجی آجوئی نا سلاہ بند آ جُہد ئٹی اوار مس۔ شہید سلال بلوچ پنجگور نا ہند پروم نا ہندی ئس اسک۔ او پیشن ڈیہہ تیٹی اسِہ خوش حال ءُ زند ئس گداریفنگ ئس ولے پُختہ اِنگا راجی شعور نا مالک فدائی سلال بلوچ دری ملک آتا خوش حالی نا زِند ئے یلہ کرے و بلوچستان آ بس۔ او 2021 ٹی بی ایل اے مجید برگیڈ ئٹی تینا خدمت آتے پیش کرے۔ شہید نہ تنیا اسِہ سیاسی سوچ نا مالک و باشعور ءُ خوانندہ ئس اسک بلکہ اسِہ گوریلہ و دلیر و عاقبت اندیش جنجگوئس اسک۔

5۔ شہید قاسم عرف تنگی لالا ولد فصل بلوچ تربت نا ہند ہیرونک نا ہندی ئس اسک۔ او 2013 ٹی بلوچ راجی آجوئی نا سلاہ بند جُہد ئٹی اوار مس۔ اسِہ دہائی ٹی او اسِہ جوانو گوریلہ سپاہی ئسینا حساب ئٹ تینے منیفے۔ کیہی جنگ آتیٹی دشمن نا لشکر ئے بے سوب کرے۔ او 2018 ٹی بی ایل اے مجید برگیڈ ئٹی تینا خدمت آتے پیش کرے، پنچ سال ٹی صبر و رازداری ئٹ تینا مشن نا انتظار ئٹ مسُنے و آپریشن درہِ بولان ئٹی اسِہ خاصءُ خفیہ مشن ئس اودے تننگا۔ او تینا جانے قربان کرسہ تینا مشن ئے جوانی ئٹ ایسر کرے ۔

6- شہید فدائی صدام حسین سیاہ پاد عرف کے ڈی ولد عزیز محمد سیاہ پاد خاران ہند ایری کلگ نا ہندی ئس اسک۔ 29 سالہ صدام حسین ٹنڈوجام یونیورسٹی سندھ آن فارغ التحصیل ئس۔ او ہنوکا ہشت سال آن سلاہ بند جُہد اتون تفوک ئس، 2016 ٹی قوضہ گیر ریاستی لشکر نا دو آن زوراکی ئٹ بیگواہ و سخت تشدد نا گواچی کننگا ولے تینا راجی آجوئی نا موقف آن دو بُرز کتو۔دشمن نا قید آن یلہ مننگ آن پد او دا نتیجہ آ سر مس کہ بلوچستان ئٹی پُر ایمن سیاست نا ہچو گنجائش ئس اف گُڑا او جدوجہد کن مسلح محاذئے گچین کرے۔ او اسہ انتہائی بالغ نظر سیاسی باسک ئسیتون اوار اسہ محنتی و جفاکش گوریلہ سپاہی ئس ہم ئس۔ او اِرا سال مُست بی ایل اے مجید بریگیڈئے تینا خدمات آتے پیش کرے۔

7:شہید فدائی زیشان زہری عرف سائیں بیبرگ ولد ڈاکٹر خان محمد زہری خضدار نا ہند پیر شیر زہری نا ہندی ئس اسک۔ او 2021 ئٹی بلوچ سلاہ بند جدوجہد تون اوار مس، 2022 ئٹی بی ایل اے مجید بریگیڈئے تینا خدمات آتے پیش کرے۔ او پختہ راجی شعور نا مالک اسہ خوانندہ ءُ سیاسی باسک ئس و انتہائی دلیر ءُ راجی سپاہی ئس و حافظ القرآن ہم ئس۔ او ایسر اسکان دشمن تون جنگ کروکا فدائین تیان اسٹ اسک۔

8-شہید فدائی حمل مومن عرف کلمیر ولد محمد بلوچ 2020 آن بلوچ راجی آجوئی نا جُہد اتون تفوک ئس۔ 23 سالہ حمل مومن گوادر نا ہند پانوان جیونی نا ہندی ئس اسک۔ او اِرا سال مُست بی ایل اے مجید بریگیڈئے بطور رضاکار تینا خدمات آتے پیش کرے۔ او قربانی نا جزبہ آن پُر اسہ باشعور ءُ گوریلہ سپاہی ئس ئس۔او آپریشن درہ بولان نا وخت آ دشمن نا ایف سی ہیڈ کوارٹر نا نیام ئٹی سر مروکا سنگت آتیان اسٹ ئس، اِرا دے اسکان او ہچ دیر و اِرغ ئسینا کُننگ، خاچنگ آن ابید دشمن تون جنگ کرے و آخر کار تینا جان ئے ندر کرے۔ او اسہ صاحب کتاب ادیب و نوشتہ کار ئس ئس۔ہرادے او شہادت قبول کرے، ہمو دے اونا کتاب ئس شنگ مس۔

9- شہید فدائی نظام بلوچ عرف ساہل ولد محمد جان پسنی ،ببر شور نا ہندی ئس اسک۔ او اِرا سال مُست بی ایل اے مجید بریگیڈئے تینا خدمات آتے پیش کرے۔ آپریشن درہ بولان نا وخت آ او بہادری نا اسہ بھلو مثال ئس جوڑ کرے۔ اونا مون تنیا دشمن نا ایس ایس جی کمانڈو تیتون تما، او گھنٹہ تے اسکان درزن آتا کمانڈو تیتون تنیا جنگ کرے و پنچ کمانڈو تے خلک، ہرانا سوب آن ایلو کمانڈوک واپس ہنِنگ کن مجبور مسُر۔

10 ۔ شہید فدائی عبدالودود ساتکزئی عرف شیہک مچھ ئنا ہندی ئس اسک ۔ اودے 2021 ئٹی قوضہ گیر پاکستانی لشکر بیگواہ کریسس ، بھاز تُو ئنا ٹارچر سیل آتا اذیت تننگ آن پد اودے آجو کننگا ۔ ہرانا سوب آن او ہندا فیصلہ آ سر مس کہ اسہ بدتہزیب ءُ دشمن ئس پرامن سیاسی زبان ئے پوہ مفک و جنگ بلوچ راج ئے غلامی نا ذلت آن نجات تننگ کیک ، اوکان پد اسہ سال ئس مہالوو او بی ایل اے مجید برگیڈ ئے تینا خدمت ئے پیش کرے ۔ فدائی ودود ساتکزئی اِرا دے اسکان بھاز خاص ءُ پوزیشن ئسیا تولوک اس ، ہراڑے دلیری تون جنگ کرِسہ دشمن ئے ایمنی کن الیتو ۔

11-شہید فدائی نادر بنگلزئی بلوچ عرف بالی ولد عبدالرحمٰن بنگلزئی کلی بنگلزئی کوئٹہ نا ہندی ئس اسک ، اسہ سال ئس مہالوو او مجید برگیڈ بی ایل اے ئے تینا خدمات ئے پیش کرے ۔ فدائی نادر بنگلزئی اسہ باشعور سیاسی کارکن و اسہ مکمکل ءُ گوریلا جنگجو ئس اسک ۔ آپریشن درہِ بولان ئٹی ٹپی مننگ آن پد ٹپی آ حالیت ئٹی پیش قدمی کرِسہ و ٹپ آتان پد ہم پین 24 گھنٹہ دشمن آ کاری ءُ ضرب کرسا کرے ۔

12-شہید فدائی زیشان رند عرف آفتاب ولد حبیب اللہ رند نواب شاہ ،سندھ ئنا ہندی ئس اسک سندھ ئٹی رہینگان پد ہم او بلوچ و بلوچستان نا دڑد آن جوانی ئٹ واقف اسک ۔تینا راجی ذمہ واری تہ ادراک ئے کرِسہ او اسہ سال ئس ءُ نیم ئس مہالو بی ایل اے نا بشخ جوڑ مس۔ شش تو مہالو او تینا خدمت آتے بی ایل اے مجید برگیڈ ئے پیش کرے و آپریشن درہ بولان ئے کامیابی ئٹ ہمکنار کننگ ئٹی بھلو کڑدار ئس ادا کرِسہ تینے وطن آ فدا کرے۔ بیرہ تینٹ او دشمن نا دہ آن زیات کارندہ آتے خلنگ ئٹی سرسہب مس ۔

13-شہید کاشف شاہوانی عرف روکین ولد حاجی شاہ محمد شاہوانی کوئٹہ نا ہندی ئس اسک ۔ او اِرا سال آن بی ایل اے نا بشخ اسک ۔او اسہ سال ئسیان ہراول دستہ فتح اسکواڈ ئٹی تینا خدمت آتے انجام تننگ اسک ۔ او بطور اسہ گوریلا سپاہی سینا جنگی صلاحیت آتیان مالا مال اسک ۔ اونا جنگی علم ، تیزی و جنگی صلاحیت آتے مدنظر تخِسہ ، اودے فتح اسکواڈ ئٹی اوار کننگا ۔ آپریشن درہ بولان ئٹی او اولی صف ئنا سپاہی اسک و شار ئٹی پیہوکا اولی سرمچار آتیٹی تُد اسک ۔ اونا بہادری نا سوب آن بی ایل اے مچھ شار ئنا کنٹرول ئے سنھبال آ ۔

بلوچ لبریشن آرمی دا کُل شہید آتا جرت و بہادری ئے و لازوال آ قربانی نا اعتراف ئے کرِسہ اوفتے خراج عقیدت ندر کیک و سوغند ہرفک کہ دا عظیم اِنگا قربانیک ہچبر مفت مفرور۔ شہید آتا دتر تیٹ آجوئی نا کسر ئے کشنگ مروئے و ڈیرے ئے ایسری مزل آجو بلوچستان ئٹی شاغنگ مروئے ۔ بلوچ راج تینا دا عظیم ئنگا شہید آتے یاد کے و اوفتا بہادری تہ قصہ آتے تینا لوری تیٹی نسل در نسل بشخسہ کے و پک کے کہ دا راج تینا محسن آتے ہچبر اُستان دپک ۔

بلوچ لبریشن آرمی دا ہم پک کننگ خواہک کہ اسپتال نا مردہ خانہ ٹی ہراکہ 14 جون تخوک ءُ ۔ اوفتیٹی 12 ننا فدائین تہ جسد خاکی کو و اِرٹ نا سیالی بلوچ لبریشن آرمی تون افک ۔ اوفتیٹی اسہ جون ئس ہندی لیویز کارندہ و اسہ دفتر نا چوکیدار ئسیناءِ ،ہرا بی ایل اے نا مون آ سرنڈر کریسُر و پدا ہموڑے کمرہ سیٹی تینے ڈکھاسُر ، جنگ ئنا سلنگ نا انتظار ئٹی اسُر ، ولئے ایف سی بھیم ئنا گواچی مرِسہ تینا مون مارٹر خلنگ ئے بناء کرے ، ہراڑان سرمچار آک رکھینگار ولے اسہ مارٹر ئسینا زد ئٹی برِسہ ارِا بےگناہ شاری خلنگا ۔ خاوت آک اوفتا پجارئے کیر ۔