بلوچستان ئٹی پاکستانی لشکر و پولیس آ 11 بمب و راکٹ جلہو کننگانے۔
ضلع آواران نا جتا جتا انگا ہند آتا پاکستانی لشکر آ پنچ جلہو کننگانے۔ حوال آتا رد ئٹ اینو سُہب ئنا آواران نا ہند پیراندر کنیرا ٹی ناُدرست سلاہ بند بندغ آک آرمی نا کیمپ آ جلہو کریر۔
ہندُن مشکے ٹی شام ئنا تنک و بنڈکی ٹی لشکری چوکی تہ نادُرست سلاہ بند بندغ آک راکٹ لانچر و ایلو سلاہ تیتون پاکستانی لشکرئے نشانہ کریر۔ہندا وڑ سلاہ بند بندغ آک پیراندر نا ہند زرانکول و چوکو ٹی برجاء انگا لشکری چوکی تہ جلہو کرسا لشکرئے جانی و مالی نسخان تسُنو۔
بلوچستان نا ضلع کیچ ئنا بھلا شہر تربت ئٹی اینو غلام نبی چوک آ بمب تراک و سُمکاری آن اسہ بندغ ئسینا ٹپی مننگ نا حوالءِ۔
تراک آن پد سیکورٹی کارندہ آک کسرئے تیوعہ بند کریر۔
ایلو نیمہ آ کچ ئنا ہند ہوشاپ ئٹی ہنوکا شام یازدہ بجہ آن پد نادُرست نیمہ آن لشکری کیمپ آ کیہی راکٹ خلنگانے۔
نصیر آباد آن حوالءِ کہ نادُرست سلاہ بند بندغ آک پولیس نا گشتی ٹیم آ بمب ئٹ جلہو کریر۔
پنجگور نا ہند گچک کھن ئٹی نادُرست سلاہ بند بندغ آک پاکستانی لشکر نا کیمپ آ جلہو کریر۔حوال آتا رد ئٹ جلہو ئٹی پاکستانی لشکرئے جانی نسخان رسینگانے۔
شال ئٹی نیو سبزل کسر آ ہوٹل نا خُڑک تراک ئٹی اِرا بندغ ٹپی مس۔
جعفر آباد، ڈیرہ اللہ یار ئٹی بھلا کسر بھٹی ہوٹل نا خُڑک تراک ئس مسُنے ہراٹی مسُہ بندغ ٹپیءِ و پین تراک ئس سلوکا ٹرک لاری نا خُڑک آ مس۔
پنجگور آن حوالءِ کہ وشبود تھانہ نا حدود پاردان ڈور آن اِرا بندغ نا جون دو تمانے۔ پولیس نا رد ئٹ جون آتا پجار اکرم ولد اسلم،عبدالمالک ولد عبدالاحد نا پن ئٹ مسُنے،ہرا وشبود نا ہندی ءُ۔
