حق دو تحریک حق پرست نا سروک محمد یعقوب جوسکی نا پاننگ ءِ کہ سامی بلوچی بازار برانز نا اینو 31 جنوری آ ارٹمیکو دے ءِ۔ واحد بخش ولد پیر محمد ہرا کہ اسہ بزرگ اسے ہرا نا ذریعہ معاش ہُچ و ہیٹ خوافنگ ءِ۔
شابیتی حوال تا رد ئٹ 28 جنوری نا نن فورسز کارندہ آک سامی نا ہند آ گھریا سے زوراکی ئٹ بیگواہی نا گواچی کریر۔ ہرا نا خاہوت 30 جنوری آ سامی بلوچی بازار نا ہند آ سی پیک روڈ ءِ فیملی نا کنڈ آن برانز کرسا بند کننگا۔
بیان ئٹ پاننگا کہ دا بزرگ نا ہچو گناہ یا ڈوہ ئس ارے تو اودے آئین و قانود نا رد ئٹ سزا تننگ مرے یا آئین شکنی و بیدس قانود نا برخلاف ننا دا پرُامن جمہوری مزاحمت برجاء مرو و سی پیک روڈ ہمو وخت اسکان بند مرو ایسکان ننا بزرگ ءِ آجو کننگ مفک۔
