بلوچ راجی آجوئی سنگر(براس) ئنا جارکش بلوچ خان تینا شنگ مروکو درشان ئسیٹی پارے کہ آواران نا ہند مشکے ٹی قوضہ گیر پاکستانی لشکر تون جھڑپ آتیٹی بلوچ راجی آجوئی سنگر نا سرمچار آک دشمن لشکر نا ہفت کارندہ خلکُر و کیہی ٹپی کریر۔
مشکے نا ہند گُرانڈی زیرہ ڈور نا ٹک آ 30 دسمبر 2023 آ قوضہ گیر پاکستانی لشکر اسہ ڈرون جلہو سے آن پد ہیلی کاپٹر آتیٹ کمانڈو تے تخیسہ(براس) ئنا کیمپ ئے گھیرہ کننگ نا کوشست کرے۔ سرمچار آک گوریلہ حکمت عملی نا رد ئٹ جتا جتا اِنگا بشخ آتیٹی مرسا دشمن نا پیش قدمی ئے توننگ کن اوفتا جلہو کرسا دشمن ئے نسخان تسُر۔
دشمن نا اسہ ڈرون جلہو ئسیٹی بلوچ راجی آجوئی سنگر نا مُسہ سرمچار سرور عرف دُرک،اعظم عرف باسط و عبدالستار عرف معراج شہید مسُر و اِرا جاگہ آ سرمچار آتا جلہو تیٹی پاکستانی لشکر کم آن کم ہفت کمانڈو خلنگا۔
ہندا وخت براس ئنا اِرا سرمچار کینگی عرف مسلم ،علی عرف عطاء قوضہ گیر لشکر آ جلہو کرسا اوفتا پیش قدمی ئے توریر و تینا ایلو سنگت آتیکن کسرئے ملار، اِرٹنگا جانباز آک کیہی گھنٹہ تینا آخری سُم اسکان جنگ کرسا دشمن نا پیش قدمی ئے توریر۔ اِرٹنگا سنگت آک سُم تہ ختم مننگ آ تینا دو تیٹ شہادت نا عظیم اِنگا مقام ئے تینا پن آ کریر۔
شہید مروکا پنچ اِنگا جانباز سنگت آتا تعلق براس ئنا جتا جتا اِنگا اتحادی تنظیم آتیان اسک۔
شہید سرور عرف دُرک ولد محمد خان مشکے، گجر نا ہندی 2012 آن راجی آجوئی کن بلوچستان لبریشن فرنٹ تون تُد ئس۔تینا بھاز اِنگا محنت و قابلیت آتا سوب آن او کیپٹن نا رینک آ تینا فرض آتے پورو کننگ ئس۔
شہید اعظم عرف باسط ولد غلام رسول مشکے، آچڑین نا ہندی 2013 آن بلوچ راجی آجوئی کن بلوچستان لبریشن فرنٹ تون تُد ئس۔او بھاز اہم ءُ جنگ آتیٹ سنگت آتون اوار مرسا بہادری نا بھلا مثال ئے جوڑ کرینے۔
شہید مروکا سنگت شہید عبدالستار عرف معراج ولد احمد مشکے نوکجو نا ہندی، بلوچ وطن نا آجوئی کن سلاہ بند مزاحمت نا بناءئے 2016 آن بلوچ لبریشن آرمی نا محاذ آن کرے۔ او کیہی اہم اِنگا تنظیمی کاریم تیٹی اوار ئس۔
شہید مروکا سرمچار شہید علی عرف عطا ولد خیربخش مشکے گجلی نا ہندی 2013 آن بی ایل ایف ئٹی اوار مرسا بلوچ راجی آجوئی کن تینا خدمات آتے تننگ ئس۔ دا وخت آتیٹی او کیہی اہم انگا وخت آتا اہم اِنگا جنگ آتیٹی بشخ ہرفسا دشمن ئے بے سُہب کرینے۔
شہید کینگی عرف مسلم ولد شہید شیہک جان مشکے میہی نا ہندی 2021 آن بلوچستان لبریشن فرنٹ تون تُد ئس۔ او آئی ای ڈی ایکسپرٹ ئسینا حوالہ ئٹ چائنگاکہ۔ اونا باوہ تون اوار خاوت نا 30 آن گیش بندغ آک راجی آجوئی نا جُہد ئٹی شہادت نا مرتب آتا سر مسُنو۔
بلوچ راجی آجوئی سنگر شہید مروکا جانباز بلوچ سرمچار آتے اوفتا عظیم اِنگا شہادت آ خراج تحسین ندر کرسا دا مظبوط اِنگا قول ئے کیک کہ شہید مروکا سنگت آتا مِشن ئے ہر حال ئٹ سُہبمند کرسا اوفتا آجو اِنگا بلوچستان نا تُغ ئے پورو کرو۔
