زوراکی ئٹ بیگواہ مروکا دین محمد بلوچ نا مسڑ و وائس فار بلوچ مسنگ پرسنز نا رہشون سمی دین بلوچ کوئٹہ ٹی بلوچ یکجہتی کمیٹی نا مروکا راجی جلسہ ٹی ہیت کرسا پارے کہ دا ریاست نا ہنداخس اوقات دا ءِ کہ مظلوم اِنگا زالبول آ تا برانز ءِ توننگ کن کرایہ نا قاتل آ تا سہارہ ئے ہلیک ۔ ننا توار ئے توننگ کن ہر طریقہ ئے کارمرز کننگ ءُ ۔ انت بلوچ نسل کشی نا چھُٹنگ ، ظلم ئنا سلسلہ بند و اوفتے حق تننگ نا مطالبہ آک داخس مشکل ءُ کہ او حل مننگ کپسہ ۔
او پارے ک مقتدرہ ئے پوہ مروئیءِ لس مخلوق پین جبر تشدد زوراکی ئٹ بیگواہی تے برداشت کروف ۔ دُن مننگ کپک نُم بندغ آ تے زوراکی ئٹ بیگواہ کبو ، بندغی حق آ تا پامالی ئے کرسا کبو ، دزگیر مروکا بلوچ ورنا تا جون آ تے بٹیسہ کبو تینا ملک ئنا آئین و قانون ئے لتاڑسہ کبو ، ڈیتھ اسکواڈ نا چُھٹفنگ نا جاگہ اسمبلی تیٹی اوفتے ننا نمائندہ کرسا مسلط کیرہ ۔
او پارے کہ ہنوکا 75 سال ئنا ظلم بلوچ ئے دا جاگہ ہیسُنے کہ داسا بلوچ ظلم و جبر و پین جون آ تے ہرفنگ آن نمنءِ ۔ داسا ننا زند ئنا فیصلہ ئے نی نہ نن تینٹ کرون ۔ مزاحمت زندگیءِ ، مزاحمت بقا ءِ، مزاحمت شعور ءِ ۔
