بلوچ وومن فورم نا مرکزی جارکش تینا شنگ مروکا درشان ئٹی پارے کہ ہرا تحریک بلوچستان ئٹی بالاچ نا شہادت آن پد تربت آن بناء کریسس ہرانا توار بلوچستان نا ہر گلی ،کوچہ و بازار آن ہلیس اسلام آباد آ ہننگ و ریاست مقتدرہ طبقہ و انٹرنیشنل میڈیا اسکان سر کریر ولے ہرا رویہ ئے ریاست ہنوکا ہفتاد ءُ پنچ سال آن بلوچ اتون تخانے او ہمو اولیکو دے آن ئنا وڑ برجاء و برجم ءِ و دا جابرانہ رویہ ئے بدل کننگ کن تیار اف انتئے کہ ریاست نا مفاد آک بلوچ تون نہ بلکن بلوچ آ تا سرزمین بلوچستان تون تفوکءِ ۔
جارکش مُستی پارے کہ اسلام آباد ئٹی ننا لُمہ ایڑ و چُنا تے امر طاقت تون توننگ نا کوشست و تشدد نا گواچی کریر او جہان نا مونا بسُر ۔ نن وار وار پارین اُن کہ بلوچ راج ئنا نسل کشی کننگ ءُ ، لُمہ آ تا چُنا تے دے ئنا مون ئٹ بیگواہ کیرہ و سال آتا سال بند کیرہ ۔ اوفتے بیدس عدالت آن خلیرہ ہرا بھلو بندغی المیہ ئسے ہرانا پاش انگا مثال بالاچ بلوچ نا بے رحمانہ خلنگ ءِ ۔
درشان نا ایسر ئٹ جارکش پارے کہ بلوچ لس مخلوق آن خواست کینہ کہ 27 جنوری آ کوئٹہ ٹی مروکا جلسہ ٹی تینا بننگ ءِ یخینی جوڑ کیر انتئے کہ ننے اسٹ مرسا ریاست ئے دا پیغام تروئی ءِ کہ بلوچ پین ظلم و جبر سگیپرو ۔
