بی وائی سی نا شنگ کننگوک آ پمفلٹ ئٹی پاننگانے کہ ریاست بلوچستان ئٹی اسہ سوگو او اشتماعی سزا نا نظام ئس کاریم ئٹ ہیسُنے، ہرانا رد ئٹ تیبہ ہند ئے اسہ زندان ئسیٹی بدل کننگانے و ہڑدے ئی زند زیمی مسنے۔
پمفلٹ نا رد ئٹ نیکروپالیکٹس نا وڑ حکمرانی نا سوب آن زوراکی ئٹ بیگواہی، ٹارگٹ کلنگ، فوجی آپریشن و دیہات آتا فوجی کیمپ آتیٹی بدل کننگ ہڑدے ئی کاریم ئس جوڑ مسُنے، ہرانا سوب آن چاگڑدی و معاشی ڈھانچہ ئے مفلوج کننگانے۔
مُستی پاننگانے کہ جتا علاقہ تیٹی فوج تینا غیر اعلانیہ قانود تے نافذ کرینے، ہرانا رد ئٹ شام آن پد ہن ئہ بر آ سخت پابندی ءِ۔ بیماری ٹی ہم شاری تے سخت مشکل تے مون تروئی تمانے۔ پمفلٹ نا رد ئٹ بھاز بندغ آتے دروغ ئنا مونتس تیٹی خلنگ آن پد سرمچار پاننگک و خاہوت آتے سرکاری بیانیہ نا رد ئٹ بیان تننگ کن مجبور کننگ مریک۔
بی وائی سی نا رد ئٹ ریاستی بیانیہ نا رد ئٹ ہر بلوچ شاری ئے مشکوک کننگانے و تیبہ چاگڑد ئے اشتماعی سزا تننگ ءُ۔ پمفلٹ ئٹی پاننگانے کہ بی وائی سی نا سربراہ تہ دزگیری ہم ہندا پالیسی نا لڑ ءِ، ہرانا مسخت کننگوک آ بندغی حق آتا برخلافی ئے ڈھکنگ و اختلاف رائے ئے توننگ ءِ۔
پمفلٹ نا ایسر ئٹ پاننگانے کہ وختس اسہ ریاست ئس بیدس تفریق آن چُنا، پیر انگا و زالبول آتے نشانہ کے گُڑا دا صاف مریک کہ دا تنیا اسہ بندغ ئسینا نا آخہ بلکن اشتماعی سزا نا منظم ءُ نظام ئسے و دا حالت ئٹی اشتماعی شعور، اواری و مزاحمت تنیا انصاف و وقار نا جہد ئے زندہ تخنگ کیک۔
