وائس فار بلوچ مسنگ پرسنز ( وی بی ایم پی) تینا شنگ کروک بیان ئسیٹی پارے کہ برکت علی نن تون حوال کرسہ تینا ایلم محمد رشید نا زوراکی ئٹ بیگواہی نا بابت ئٹ تنظیم ئے حال تسُنے۔
برکت علی نا پاننگ ءِ کہ اونا ایلم محمد رشید ولد مولا بخش ڈیرہ بگٹی نا ہندی ئسے و پولیس نا سپاھی ئسے، اودے 02 فروری 2021 آ شال آن زوراکی ئٹ بیگواہ کننگانے۔
او پارینے کہ تینا ایلم نا آجوئی کن سرکاری کالخواہ و انتظامیہ تون بھاز وار ہیت کرینٹ نہ کنا ایلم آجو کننگانے نہ اونا بابت ئٹ ننے ڈس ئس تننگ ءُ۔ ہندانا سوب آن ننا خاہوت پریشانی تون مون تننگ ءِ۔
وی بی ایم پی نا چئیرمین نصراللہ بلوچ سرکار آن خواست کرینے کہ اوفک محمد رشید نا آجوئی ئے یخینی جوڑ کیر و آجوئی کن اُست جمی ایتر۔ اوڑا امرو ہم دوبہ ئس ارے اودے عدالت ئٹی ہتنگ مرے تانکہ خاہوت دا عزاب آن آجو مرے۔
او پارینے کہ تنظیم ئے ہندا حال سر مسُنے کہ 18 فروری آ پاکستانی فوج خضدار نا ہند گزگی آن مشکے، نوکجو نا ہندی زالبول حیات بی بی ئے برمتہ کننگ آن پد بیگواہ کرینے، نن دانا مذمت ئے کینہ و بلوچ زالبول ئے زوت مونی ہتنگ نا خواست کینہ۔
