بلوچ آجوئی دوست رہشون ایڈوکیٹ رحیم بلوچ پاکستان نا کُنڈان اوغانستان نا صوبہ ننگرہار و پکتیکا آ جلہو تے شیف خلِسہ پارینے کہ دا جلہو جہانی قانود، اقوام متحدہ نا منشور و اوغانستان نا آجوئی نا برخلاف ءِ۔
رحیم بلوچ پارینے کہ ای مُچ خاہوت آتیتون اُست ہسونی نا درشانی ءِ کیوہ ہرافتا دوست ءُ عزیز آک بیران مسنو و ٹپی مروکا تا دراخی کِن دعا کیوہ۔
او پارینے کہ ہندن گمان مریک کہ پاکستان نا ہوش ہنانے کہ گدرینگوکا بیست سال نا نیام ئٹی او تینا ہمسایہ ملک ایران، اوغانستان و ہندوستان نا برخلاف بُڑزی جلہو کرینے دا جہانی قانود نا آجو آ ریاست آتا حق آتا برخلافی ءِ۔
بلوچ رہشون پارینے کہ بلوچستان ئٹی برجاء غا فوجی کاروائی تا بابت ئٹ بھلو خُلیس ئسے کہ اوڑے زوراکی ئٹ بیگواہی، تشدد، وے قانودی ئٹ کھسفنگ، قانود نا رِد ئٹ کاریم وے ہلنگ و مُچی نا سزا اوار ءِ۔ دا بابت ئٹ اقوام متحدہ، بندغی حق آتا تنظیم و جہان نا مُچ جمہوری ملک آن زوت پام ایتر تانکہ جہانی بندغی حق آتا قانود و ذمہ واری تا رد ئٹ پٹ ئہ پول و دلجمی تننگ مرے۔
