بی وائی سی نا رہشون سمی دین بلوچ تینا بیان ئسیٹی پارے کہ حمدان بلوچ ولد محمد علی 29 دسمبر 2025 آ کراچی نا ہند یوسف گوٹ آن زوراکی ئٹ بیگواہ کننگا و پدا اونا دزگیری ہم پاش کننگاسس، او عدالت ئٹی ہتنگ مسس، اونا کیس سندھ ئنا بھلا عدالت ئٹی جمع مننگ اسک۔ اینو اونا ریمانڈ ایسر مروئی اسک ولے اوکان اسہ دے ئس مُست او پین مُسہ زوراکی ئٹ بیگواہ کننگوک ءُ بندغ آتون اوار دروغ ئنا مونتس ئٹی خلنگانے۔
سمی دین پارے کہ بلوچستان ئٹی دروغ ئنا مونتس نا وڑ انگا کارائیک تیزی ئٹ برجاء ءُ و داسا ہمو بندغ آتے ہم خلنگ ءُ ہرافک عدالت ئٹی ہتنگ مسنو۔ دا روشت ہندا ہیت ئنا دلیل ءِ کہ سی ٹی ڈی و پولیس قانود و عدالت نا برخلاف کننگ ءُ و تینے قانود و عدالت آتیان بُڑز پہہ مرسا کاروائی کننگ ءُ۔ قانود نا رکھوال آ ادارہ آک غیر قانودی کاروائی تا برخلاف ریاستی ادارہ و عدالت آتا بے تواری اوسوز نا ہیت ئسے۔
سمی دین پارے کہ حمدان نا خاہوت دا بھلا ناحقی نا برخلاف کراچی پریس کلب نا مونا برانز کرینے۔
او پارے کہ ریاستی زوراکی و نا انصافی تا برخلاف توار بُڑز کروکا کُل مخلوق،تنظیم و پامدار آ شاری تیان خواست کینہ کہ اوفک دا زوراکی تا برخلاف توار بُڑز کیر تانکہ زوراکی ئٹ بیگواہی و دروغ ئنا مونتس تا لڑ توننگ مرے۔
