پاکستانی فوج ئنا دو آن زوراکی ئٹ بیگواہ کننگوک آ ورنا کاشف بلوچ نا خاہوت تینا بیان ئسیٹی پارینے کہ کاشف بلوچ کراچی نا ہند لیاری نا ہندی ئسے ہرادے 18 فروری نا شام ئنا دو بجہ غا پاکستانی فوج برمتہ کرسا بیگواہ کرینے، اونا بیگواہی آن پد ہچو حوال ئس اف۔
خاہوت پارے کہ کاشف بلوچ داکان مُست ہم 29 جولائی آ صدر نا ہند اما ٹاور نا دکان آن برمتہ کننگ و بیگواہ کننگاسس، منہ تو آن پد او آجو مس۔ استو اودے پدا اُراغان برمتہ کرسا بیگواہ کرینو۔
خاہوت پارینے کہ لیاری نا جتا جتا ہند آتا پولیس و پاکستانی رینجرز کاروائی ٹی 13 بندغ آتے برمتہ کرسا بیگواہ کرینے۔ داسکان سرکار نا نیمہ غان کاشف نا بابت ئٹ ہچو حوال ئس تننگ متنے۔
او بندغی حق آتا ادارہ تیان خواست کرینو کہ اگہ کاشف بلوچ آ امرو ہم دوبہ ئس ارے گُڑا قانود نا رد ئٹ مونی ہتنگ مرے، اگہ بے گناہ ءِ گُڑا اودے زوت آجو کیر۔
خاہوت پارینے کہ کاشف اسہ دکاندار ئسے او پین ہچو غیرقانودی کاریم ئسیٹی اوار متنے۔
