کراچی ٹی سی ٹی ڈی نا دروغ ئنا مونتس ئٹی زوراکی ئٹ بیگواہ کننگوک عدنان بلوچ نا ناحق کوش ئنا برخلاف کراچی پریس کلب نا مونا برانز کننگا۔ برانز ئٹی چُنا و زالبول آتون اوار بھلو کچ ئسیٹی بندغ آک بشخ ہلکُر ہرافتا دو تیٹی پلے کارڈ اسک و اوفتا جتا جتا نعرہ نوشتہ اسک۔
برانزی تا پاننگ اسک کہ گولیمار نا ہندی ورنا حمدان ولد محمد علی زوراکی ئٹ بیگواہ کننگ آن پد دروغ ئنا مونتس ئٹی خلنگ مسُنے۔ داسا اونا جون ئے ہم خاہوت ئے تننگ افس۔
حمدان نا باوہ محمد علی تران کرسا پارے کہ کنا چُنا حمدان بلوچ ئے 29 دسمبر 2025 آ سی ٹی ڈی نا کارندہ آک دھوبی گاٹ پہل ئنا خُڑک آن برمتہ کریسُر۔ پدا شش جنوری آ سی ٹی ڈی اسہ پریس کانفرنس ئسیٹی دعویٰ کریسس کہ حمدان ئے رئیس گوٹ آن اسہ سلاہ بند تنظیم ئسیتون خُڑکی و کمکاری نا بنیات آ دزگیر کرینو۔
او پاریسس کہ سئے شمبے نا دے سی ٹی ڈی نا نیمہ غان پڑو ئسیٹی پاریسس کہ حمدان بلوچ مون پہ مون جنگ ئسیٹی خلنگانے و او تینا جند ئنا سنگت آتا سُمکاری آن خلنگ مسُنے۔
خاہوت خواست کرے کہ دا تدینی ٹی اوار سی ٹی ڈی نا سربراہ و کارندہ تا برخلاف ایف آئی آر نوشتہ کننگ مرے و حمدان بلوچ نا جون ئنا پوسٹ مارٹم مرے و راستی مونا ہتنگ مرے۔
