غیبی ءُ اسہ خِیال ئسے، دئسکا کَسَری ءِ
ہَلّْ، شئیر ئسینا پَلَوَئٹی تَف شَکَری ءِ
اونا تو سما اف ، کنے تینا ہم خَبر اف
انتَس کہ سماۓ ، او کنا بے خَبَری ءِ
دیچا ، دروۓ اِشک اَرا مِزل ءَ پام ءِ
بے سار ئسینا سار ئسے تو ہمسفری ءِ
دانائی نا زیبائی تینا پڑدہ ءِ تینٹ
مَنتَر، نہ کہ جادوئی ءِ ، نئے کہ نَظَری ءِ
طوفان برے زور خلے ، جِبر و جَفا کے
کَنتون کنا مہرئنا نازُرک ءَ پَری ءِ
پِرِک نا برام ءِ یاکہ دا پُھل ئنا جَنّ ءِ ؟
رنگ آن کہ بَڈ ءِ…. ، کہ زباد آن بَری ءِ
ای نَدر و صَدَخّہ مِشی ءَ فکرئنا تینا
ڈَکھانے جہان آن کنا بے ہُنَری ءِ
اَنت ہَرِفِسہ ڈیہہ ئنا باتی تا حوال ءِ!
ہڑدے ہمے جنجال ءِ ہمے در پہ دری ءِ
جوہان ئسے معنی نا تہ ہَر لَوزئنا دانہ
باری نا قلم لاب ئٹی اینو ہَشَری ءِ
آجو نا غزل نا اسہ بندئس ارے پین ام
او اُست ئنا بند ءِ ، ولہ ٹھَپ ءِ ، دِتَری ءِ
ڈاکٹر باری آجو
