حب چوکی آن پاکستانی فوج چھاپہ خلِسہ جھاؤ نا ہندی ورناس ئے برمتہ کننگ آن پد بیگواہ کرینے۔
زرمبش حوالکار نا رد ئٹ زوراکی ئٹ بیگواہ کننگوک آ ورنا نا چائنداری نادل بلوچ ولد خیر محمد جھاؤ، کوھڑو نا ہندی نا پن ئٹ مسنے۔ ہرادے استو دوانزدہ بجہ غا پاکستانی فوج حب چوکی نا ہند دارو ہوٹل نا خڑک اُرا ئسے آ چھاپہ خلنگ نا وخت برمتہ کرسہ تینتون درینے، ہراڑاان پد نادل نا ہچو ڈس ئس اف۔
نادل بلوچ داکان مُست ہم 21 اپریل 2019 آ تینا چُنکا ایلم سدید بلوچ نا اواری ئٹ برمتہ کننگ آن پد بیگواہ کننگاسس، پدا 21 جنوری 2021 آ آجو کننگاسُر۔
ہندی حوال تا رد ئٹ نادل بلوچ نا خاہوت ئے پنچ سال آن گیشتر ءِ کہ پاکستانی فوج جھاؤ آن زوراکی ئٹ ہمپِفینے و اوفک حب چوکی آ بسنو۔
نادل بلوچ نا زوراکی ئٹ بیگواہی نا حوال ئے اونا خاہوت پک کرینے و بندغی حق آتا ادارہ تیان خواست کرینے کہ او اونا آجوئی کن توار بُڑز کیر۔
