بلوچ یکجہتی کمیٹی نا بنجائی راہشون سمی دین پارینے کہ ریاست بلوچ قوم ئے قوم ئسینا دروشم ئٹ آخہ بلکن اسہ دشمن ئسینا دروشم ئٹ ہُرِک ۔ و دا سوچ بلوچستان ئٹی برجاء سخت انگا انسانی حق آتا لتاڑ نا بنیات ءِ ۔ او پارے کہ ریاست نا مسئلہ نہ بیرہ بلوچ انسر جنسی ءِ ، نہ کاؤنٹر ٹیررازم ، و نہ پن کروک ناراض بلوچ ، بلکن اصل مسئلہ بلوچ نا پجار و وجود ءِ۔
او پارے کہ دا سوچ ئنا رد ئٹ بلوچ نرینہ، زالبول، ورنا، پیر انگا کماش و چنکا چُناتے زوراکی ئٹ بیگواہ کننگ ءِ یا کھسفنگ ءِ ۔ دا بلوچ کُش پالیسیک تینٹ ہمو حقیقت ئے پاش کیرہ کہ ریاست ئے بلوچ نا مزاحمت آن آخہ بلکن اونا پجار آن مسئلہ ءِ۔
سمی دین نا رِد ئٹ دہشت گردی و کاؤنٹر ٹیررازم نا بیانیہ بیرہ اسہ پڑدہ ئسے ۔ ہرانا خیر آن ریاست تینا بلوچ دشمن پالیسی تے جواز جوڑ کیک و دنیا نا مونا اوفتے جائز ثابت کننگ نا کوشست کیک ۔ اگہ دا واقعی کاروائیک کاؤنٹر ٹیررازم نا زمرہ ٹی بریرہ ، تو دُو خالی زالبول، نت کُبین زالبول و سینزدہ سالی آ چُنا تا زوراکی ئٹ بیگواہ کننگ آخر اَرا قانود و اَرا منطق نا رد ئٹ ئٹ درست پاننگ مریک ؟
او پارے کہ ہراتم بلوچ نسل کُشی نا ہیت مریک تو اودے دروغ ئنا بیان ئس پارہ ، حالانکہ اسہ قوم ئسیکن داڑان بھلالو نسل کُشی پین ارا مرو ،اونا ایسر کننگ کن کُل حد آک پار کننگ ءُ و نرینہ، زالبول، پیر انگا کماش و چُنا تا نیام ئٹ انت تمیز مروف۔
سمی دین پارے کہ دنیا ٹی مہذب قوم دشمنی و جنگ ئنا حالیت ئٹ ہم زالبول و چُنا تے جتا و رکھوک تصور کیرہ، ولے بلوچ قوم ئنا بد قسمتی دادے کہ ہمو ریاست اوفتے دشمن پائک ہراٹی ھچو تہذیب ئس اف و نہ انسانیت اریتہ۔ ملکی و جہانی قوم آئین و قانود داسہ بیرہ کاغذی دعوی جوڑ مننگ ءُ، ہرانا عملی دروشم ئٹ ھچو وجود ئس اف۔
ایسر ئٹی او جہانی بندغی حق آتا ادارہ و مہذب دنیا غان خواست کرے کہ اوفک بلوچستان ئٹی برجاء زوراکی ئٹ بیگواہی ، بیدس عدالت آن کوش و بلوچ قوم ئنا برخلاف برجاء پالیسی تا زوت و سنجیدہ نوٹس ہلیر۔
