گوادر نا ہند جیونی ٹی اِرا دے ءِ کہ پاکستانی فوج ئنا نیمہ غان زوراکی تا لڑ برجاء ءِ، پاکستانی فوج پین اِرا بندغ ئے دزگیر کننگ آن پد بیگواہ کرینے۔
بیگواہ کننگوک آ بندغ آتا چائنداری سراج بلوچ ولد نور بخش و شبیر بلوچ ولد عبدل نا پن تیئٹ مسنے ہرا پانوان نا ہندی ءُ۔ پن کروک بندغ آتے استو پاکستانی فوج اُراغان دزگیر کرسا بیگواہ کرینے۔
ہندی حوال تا رد ئٹ پاکستانی فوج جیونی نا ہند پانوان ئٹی درو ننکان زوراکی تے بناء کرینے و اِرا دے آن پد تیبہ ہند ئے گھیرہ کرسا اُرا تیٹی پٹ ئہ پول کننگ ءِ۔
ہندن درو ننکان ہم پاکستانی فوج ہندا خلق آن رزوان بلوچ ولد عبدالرشید، سمید بلوچ ولد عبدالحمید و شبیر بلوچ ئے بیگواہ کریسس۔ اِرا دے نا نیام ئٹی پاکستانی فوج پنچ بندغ ئے دزگیر کننگ آن پد بیگواہ کرینے۔
