بی ایل ایف نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ قلات ئٹی دشمن نا نیمہ غان 25 دسمبر آ ڈرون جلہو ئٹی بلوچستان لبریشن فرنٹ نا پنچ سرمچار شہید مرسا وطن کن ندر مسُر ہرافتے دروت ندر کینہ۔
ترجمان پارے کہ شہید مروکا سنگت آتیٹ سنگت عبدالاحد دہوار عرف گزین ولد ہمایون دہوار مستونگ، کلی کاریز نا ہندی، شہید اسرار احمد عرف ابرار ولد حسین مستونگ، گرگینہ نا ہندی، شہید شعیب احمد عرف سوبدار ولد محمد علی جیوا خضدار نا ہندی، شہید عبید اللہ سیاہ پاد عرف سبزو ولد پیر جان خاران نا ہندی، شہید فیصل بادینی عرف قاضی ولد محمد ابراہیم خاران نا ہندی اوار ءُ۔
ترجمان پارے کہ شہید عبدالاحد 2023 ئٹی بلوچستان لبریشن فرنٹ ئٹی اوار مس و شاری سرمچار ئسینا لحاظ ئٹ کیہی ہند آتا تنظیمی و قومی فرض آتے پورو کننگ اسک۔ او تنظیمی فیصلہ نا رد ئٹ 2025 ئٹی شور، پارود کیمپ آ بس۔ شہید نا قابلیت و محنت ئے ہرسا اودے کیمپ ئٹی ٹریننگ ماسٹر نا ذمہ واری تے تننگا۔ او تینا شہادت اسکان ٹریننگ ماسٹر نا ذمہ واری تے جوانی ئٹ پیلو کننگ اسک۔ شہید عبدالاحد اسہ محنتی، قابل و سیاسی شعور آن پُر سلاہ ءُ سرمچار ئس اسک۔سرمچار عبدالاحد جان 25 دسمبر آ ڈرون جلہو ئٹی سخت ٹپی مس۔ سنگت سرمچارک اودے بنداتی علاج کن رھکوک ہند آ دریر ولے او بھاز ٹپ آتے وے سگھِسہ 27 دسمبر 2025 آ شہادت نا جام ئے نوش کرے و بلوچ راجی تاریخ ئٹی ساندہ زندہ مس۔
ترجمان پارے کہ شہید اسرار احمد عرف ابرار ولد حسین اگست 2025 ئٹی بی ایل ایف ئٹی اوار مس و اول او تنظیم نا ہدایت نا رد ئٹ تنظیم نا شاری انٹیلیجنس ونگ ئٹی ذمہ واری تے ثابت قدمی و مخلصی ئٹ پیلو کننگ اسک۔ او 25 دسمبر آ کوزہ کروک پاکستانی فوج ئنا ڈرون جلہو ئٹی قلات نا محاذ آ شہید مس۔
ترجمان پارے کہ شہید شعیب احمد ولد محمد علی خضدار، جیوا نا ہندی داسا زوت بی ایل ایف ئٹی اوار مسس و تربیت کن کیمپ ئٹی ساڑی اس۔
شہید شعیب جان اسہ خوانندہ ءُ، خواری کشوک، دلیر و نظم و ضبط نا بھاز پابند ءُ سرمچار ئس اسک۔ 25 دسمبر آ او قلات نا محاذ آ ایلو سنگت آتون اوار کوزہ کروک لشکر نا ڈرون جلہو ئٹ شہید مس۔
عبیداللّہ سیاہ پاد عرف سبزو ولد پیرجان، خاران نا جہی نومبر 2025 ٹی باقاعدہ بلوچستان لبریشن فرنٹ ئٹ اوار مس۔ داکان مُست او تنظیم نا ہمدڑد ئسے نا حیثیت ئٹ خاران شار ئٹ تنظیمی کاریم تیٹ سرمچار آتا کمک ئے کریکہ۔ او تربیتی کیمپ ئٹ کم وخت مس ولے دا کم وخت ئٹ او اسہ ایماندار، خواری کشوک و پابندو سرمچار ئس ثابت مس۔ او 25 دسمبر آ قلات ڈرون جلہو ئٹ شہید مس۔
فیصل بادینی عرف قاضی ولد محمد ابراہیم، خاران نا جہی قومی آزادی نا جنگ ئکن اِرا سال مُست بلوچستان لبریشن فرنٹ ئٹ اوار مس۔ اول ئٹ او تنظیم نا انٹیلیجنس ونگ تون تفوک اسک۔ تینا کاریم تا سوب آن کوزہ کروک دشمن نا ڈھکوک ادارہ غاتا خن ئٹ بس ہرا نا سوب آن تنظیم اودے کیمپ آ ہیس۔ دا چنکا وخت ئٹ او تنظیمی کاریم تیٹ متحرک اس و 25 دسمبر آ ڈرون جلہو ئٹ شہید مس۔
بلوچستان لبریشن فرنٹ وطن نا آجوئی، قومی شرف و بقاء کن ورنا سرمچار تا شہیدی آ اوفتے دروت ندر کیک و دا عزم ئے کیک کہ شہید آتا تُغ آجو بلوچستان نا دوئی مننگ اسکان اوفتا عظیم مشن ئے برجاء تخون۔
