کیچ ئنا ہند تجابان ئٹی پاکستانی فوج ئنا دو آن زوراکی ئٹ بیگواہ کننگوک آ حانی بلوچ، خیرالنسا بلوچ و مجاہد بلوچ نا زوراکی ئٹ بیگواہی نا برخلاف خاہوت آک اسہ وارس پدا برانز کرسا سی پیک کسر ئے بند کریر۔
برانز ئٹی چُنا و زالبول آتون اوار بندغ آک بھلو کچ ئسیٹ بشخ ہلنگ ءُ۔ کسر نا بند مننگ نا سوب آن اِرٹنگا نیمہ تیان لاری تہ بھلو قطار ئس سلیسُنے۔
برانزی تا پاننگ ءِ کہ ننا مُسہ بندغ حانی بلوچ ولد دلجان، خیرالنسا بلوچ ولد عبدالواحد و مجاہد بلوچ ولد دلجان پاکستانی فوج ئنا ڈھکوک ٹارچر سیل تیٹی بند ءُ۔
اوفتا پاننگ ءِ کہ زوراکی ئٹ بیگواہ کننگوک آ حانی بلوچ ئے ہشت تو مریک بیجان ءِ۔ داخس دے گدرینگ آن پد ہم ننا بندغ آتے مونی ہتنگ افس۔
خاہوت آتا پاننگ ءِ کہ اگہ بندغ آتیا امرو ہم دوبہ ئس ارے گُڑا عدالت ئٹی ہتنگ مریر۔ بے میار ءُ گُڑا زوت آجو کننگر۔
داکان مُست ہم خاہوت آک پنچ دے اسکان تجابان کرکی ٹی برانز کرسا سی پیک کسر ئے بند کریسُر، ہندی کالخواہ نا نیمہ غان یخین تننگ آن پد برانز ایسر کننگاسس۔
اوفتا پاننگ ءِ کہ کالخواہ نا نیمہ غان قول آتا پاسداری وے مننگ آ نن مجبور مسونُن کہ اسہ وارس پدا برانز کین۔
