بی ایل ایف نا ترجمان میجر گہرام بلوچ میڈیا ٹی شنگ کروک بیان ئسیٹی پارے کہ سرمچارک 25 دسمبر نا شام ئنا شش بجہ غا سوراب بازار ئٹی ایف سی و پولیس نا اواری ئٹ ناکہ بندی آ جلہو کریر۔ جلہو ئٹی اِرا ایف سی کارندہ خلنگار و مُسٹ ٹپی مسر۔
ترجمان پارے کہ اسہ پین کاروائی سیٹی 25 دسمبر نا شام ئنا پنچ بجہ غا سرمچارک اورماڑہ نا علاقہ بسول ئٹی پاکستانی فوج آ جلہو کریر۔ مُست سرمچار آتا اسنائپر ٹیم کیمپ ئنا رکھوک آ مورچہ آ تولوک کارندہ سے نشانہ کریر ہرا ہمو جاگہ غا خلنگا۔ رکھوک آ مورچہ ٹی تولوک کارندہ نا خلنگ مننگ آ کیمپ ئنا تہٹی خُلیس و فوجی کارندہ تا ہن ئہ بر ئے ہُرسا سرمچار تا اسہ ٹولی ئس منہ منٹ آن پد فوجی کیمپ آ آر پی جی و ایلو بھلا سلاہ تیٹ جلہو کریر، ہرانا سوب آن مُسہ کارندہ خلنگار و کیہی ٹپی مسر۔
ترجمان گہرام بلوچ پارے کہ جوابی کاروائی ٹی دشمن فوج تینا عادت نا حساب ئٹ جتا نیمہ غاتیا مشین گن تیٹ سُمکاری کرے و مارٹر نا گولہ خلک۔ واہم کاروائی ئے پورو کننگ آن پد سرمچارک سلامتی ئٹ اوکان پیشتمار۔
ترجمان پارے کہ بی ایل ایف اورماڑہ و سوراب جلہو تیٹی دشمن نا شش کارندہ تا خلنگ نا ذمہ واری ئے ہرفک۔
