پاکستانی فوج ئنا دو آن زوراکی ئٹ بیگواہ کننگوک اسہ خاہوت نا چھار بندغ داسکان بیگواہ ءُ۔
بلوچستان نا ضلع کیچ ئنا علاقہ کرکی تجابان نا ہند آ مُسٹمی دے ہم سی پیک کسر بند کننگا، ہرانا سوب آن لاری تا بھلو قطار ئس لگانے، انتظامیہ تون مذاکرات اسہ وارس پدا بے سوب مس۔
پاکستانی فوج ئنا دو آن زوراکی ئٹ بیگواہ کننگوک آتیٹی ہشت تو ئنا بیجان آ 27 سالی آ زالبول ہانی بنت دل جان، 17 سالی آ خیرالنساء بنت عبدالواحد، 18 سالی آ مجاہد ولد دل جان و 18 سالی آ فرید ولد اعجاز اوار ءُ۔
خاہوت پاریسس کہ بیگواہ کننگوک بندغ آتا آجوئی اسکان برانز و ہڑتال ایسر مفرو، ڈپٹی کمشنر کیچ بشیر احمد بڑیچ نا پاننگ آ اسسٹنٹ کمشنر تربت محمد حنیف کبزئی و ہندی معتبر آک برانزی تیتون مذاکرات کریر واہم ہچو نتیجہ ئس پیشتمتو۔
کسر بند مننگ نا سوب آن مال دروک و مسافر لاری تا ہن ئہ بر زیمی ءِ و برانزیک کالخواہ تیان نوٹس ہلنگ و بیگواہ کننگوک آتے زوت آجو کننگ نا خواست کریر۔
ایلو نیمہ غا بلوچستان ئٹی زالبول آتا زوراکی ئٹ بیگواہی نا تدینی تا زیات مننگ و تربت برانز ئٹی تولوک خاہوت آتون اواری کن بی وائی سی نا نیمہ غان پنچ دے ئنا برانزی مہم ہم برجاء ءِ۔
تنظیم پڑو کرینے کہ او بلوچستان ئٹی زالبول آتا زوراکی ئٹ بیگواہی تا برخلاف پنچ دے ئنا برانزی مہم اڈ ترو و بندغی حق آتا ادارہ تیان خواست کرینو کہ او بلوچستان ئٹی برجاء انگا زوراکی ئٹ بیگواہی تا نوٹس ئے ہلِسہ بیگواہ انگا بندغ آتا آجوئی کن جوانو گامگیج ہرفِر۔
