بی ایل ایف نا ترجمان میجر گہرام بلوچ میڈیا ٹی شنگ مروکو بیان ئسیٹی پارے کہ 23 دسمبر نا ویگ ئنا 5:30 بجہ غا بلوچستان لبریشن فرنٹ نا سرمچار آک کولواہ نا ہند کنیچی ٹی پاکستانی لشکر ئے ہمو وخت ٹک کریر ہراتم اوفک خُڑک ئنا علاقہ تیٹی سرچ آپریشن کننگ آن پد تینا بنجائی کیمپ ئنا نیمہ غا ہننگ ئٹی اسُر ۔ سرمچار آک دشمن آ بھلا سلاہ تیئٹ جلہو کریر ہراڑان دشمن لشکر نا گاڑی تے بھاز نسخان رسینگانے ۔ سرمچار آتا جلہو نیم گھنٹہ ئسے اسکان برجاء مس۔
ترجمان پارے 12 نومبر 2025 آ بلوچستان لبریشن فرنٹ نا سرمچار آک ڈھکوک ونگ ئنا نیمہ غان حوال رسینگوک آ کاروائی کرسہ زاہد ولد نودی سنڈم گیشکور نا جہی ءِ ھور ئنا ہند آ دزگیر کریر ۔ پدا تنظیم نا سرسوج کروکا ٹیم اوڑان شابیتی ئٹ سرسوج کرے۔
ترجمان گہرام بلوچ پارے کہ سرسوج نا وخت زاہد نودی تینٹ پارے کہ ای اگست 2024 آن پاکستانی لشکر کن جاسوسی کرینُٹ ۔ او ہندا پارے کہ ای سرمچار تا برخلاف کیہی جہہ تیا ناکہ بندی تیٹی اوار مسنُٹ ۔
ترجمان بیان ئٹی پارے زاہد نودی نا زی آ لگوک دوبہ تا پک مننگ آ تنظیم نا ادارہ انصاف اودے مرگ ئنا سزا تننگ نا فیصلہ ئے کرے ۔ ہراڑا سرمچار آک عمل کرسہ 22 دسمبر آ 6:30 ئنا وخت گیشکور نا ہند گراڈی ٹی زاہد نودی ئے خلکُر ۔
او پارے بلوچستان لبریشن فرنٹ زاہد نودی آن رسینگوک حوال تا بنیات ئٹ پین قوم دشمن تا برخلاف مُستی کاروائی تے برجاء تِخو۔
بیان ئٹی پاننگا یاتی مرے کہ دا علاقہ ٹی بلوچ تحریک آزادی نا برخلاف کاریم تیٹی اُلس ئے مخبر کرفنگ و ڈیتھ اسکواڈ ئٹی بھرتی کننگ ، اوفتے منظم کننگ و باقاعدہ ذمہ داری تننگ نا عمل جیئند ساجدی نا بھلُنی ٹی برجاء ءِ۔
ترجمان ایسر ئٹ پارے کہ بلوچستان لبریشن فرنٹ کولواہ ٹی آ جلہو و ڈیتھ اسکواڈ نا کارندہ نا خلنگ نا ذمہ واری ئے ہرفِک ۔
