بلوچ آجوئی خواہوک راہشون عبدالنبی بنگلزئی بلوچ نیشنلسٹ آرمی( بی این اے) نا لغور مروکا کمانڈر سرفراز بنگلزئی نا ہنوکا دے پاکستانی حوالکار ئسے تروکا انٹرویو آ افسوسی نا درشان کرسا پارے کہ جُہد آن نرنگ ملامتی ئسے، سنگت و تینا خُڑک ئنا عزیز آتا قربانی تیان پد ارا سربراہ جُہد آن دو کشے یا نا اُمیت مرے او تاریخ ئٹی جوانو لوز آ تیٹی یاد کننگ مفرو۔ آجوئی نا جُہد ئٹی شہید مروکا بندغ آک نمیرانءُ، دا کسر آ اوفتا نظریہ نا قربانی تہ سلسلہ برجاء ءِ۔ دا جُہد ئٹی پوسکُنا نسل تیارءِ، نا اُمیت مننگ یا دشمن نا مونا سرائے شیف کننگا تنیا اسہ کردار ئس نزور مریک، جُہد مفک۔
او پارے کہ آجوئی نا جُہد ئٹی جنجال،بین و ملاسی،بیماری دا مروئیءُ گڑاءُ۔ ارا بندغ دا کسرئے گچین کیک او تینا کُل خواہش آتے کھسفک و ہر وڑ ئنا تنگ اِنگا وخت آتے مون تننگا شعوری حوالہ ئٹ تیار مریک۔ داکان پدا اگہ کس ئس مال و دولت، خواہش آتا رند ئٹ تمک گُڑا اونا انقلابی صلاحیت و ہمت ختم مریک۔ ای راجی آجوئی جُہد ئنا سُہبمندی تے خننگ اُٹ، تنظیم آتا سربراہی تیٹی جنگ پوسکُنا جاگہ آتا برجاء ءِ۔ سرفراز بنگلزئی کنا بابت ئٹ ردءُ ہیت کننگ نا جاگہ سلاہ آتے بٹنگ آن پد ملامت مرسا بے توار مروس جوان ئس۔
