بی ایل ایف نا ترجمان میجر گہرام بلوچ میڈیا ٹی شنگ مروکو بیان ئسیٹی پارے کہ بلوچستان لبریشن فرنٹ نا سرمچار آک 23 اکتوبر 2025 آ نال ئنا علاقہ کلیڑی ٹی اسہ لٹ ئہ پل کروک منصوبہ ئسے آ کاریم کروک جوڑشتی آ کمپنی آ جلہو کرسہ ساڑی مشینری تے بھس کریر۔ ہندا وڑ اوڑے ساڑی 19 کارندہ ئے دزگیر کننگا۔
او پارے ہندا وخت کوزہ کروک پاکستانی لشکر جتا وخت آتیئٹ دا علاقہ ٹی فضائی و ڈغاری آپریشن کرے، ہرانا مسخت تنظیم نا کنڈ آن دزگیر کننگوک بندغ آتے نسخان تِننگ اسک۔ ولہ سرمچار آک دشمن نا کھل چم آتے بے سوب کرسہ دزگیر کننگوک بندغ آتے سخت انگا حالیت ئٹ ہم رکھوک تِخار۔
ترجمان بیان ئٹی مُستی پارے انتئے کہ دزگیر کننگوک کارندہ تیان گیشتر نا تعلقداری ہمسایہ و برادر سندھی قوم آن اسک۔ ہندا خاطر آن سندھی آجوئی خواہوک تنظیم ایس آر اے تون اوار جتا قوم پرست و بندغ دوست ادارہ و بندغ آتا کنڈ آن دافتا آجوئی کن وار وار خواست کننگا۔ قوم پرست تنظیم، خاص براس ئٹی اوار ایس آر اے نا رہشون و بلوچ سندھی تا تاریخی اواری نا شرف ئے ہُرِسہ تنظیم دزگیر کننگوک آ سندھی کارندہ تے شرفداری ئٹ آجو کرے۔ ہرافک داسہ تینا خاہوت آتے سر مسنو۔
بیان ئٹی پاننگا کہ ہندا وڑ 12 دسمبر آ بیسمہ نا علاقہ ٹی ناکہ بندی نا وخت آ بی ایل ایف نا سرمچار آک پاکستانی محکمہ کسٹمز تون تفوک ارا کارندہ ئے دزگیر کریر۔ سیاسی آ بندغ آتا خواست و بندغی نا بنیات آ دزگیر کننگوک بندغ آتا جوانو وڑ ئسے ئٹ خیال داری کننگا، و سر سوج نا عمل نا پورو مننگ آن پد تومکا تے رکھوک وڑ ئٹ یلہ کننگا۔
ترجمان ایسر ئٹ پارے کہ بی ایل ایف تینا دزگیر ئٹی ساڑی کھل بندغ آتے رکھوک وڑ ئٹ یلہ کرینے ، اسہ ذمہ وار او تنظیم ئسینا حیثیت ئٹ ہچ دنو بندغ ئسے نسخان تفک ہرا بلوچ نا دشمنی ٹی اوار مف۔ نن ہمسایہ قوم ، خاص وڑ ئٹ سندھی و پشتون تیان خواست کینہ کہ او تیبہ بلوچستان ئٹی پاکستان نا لٹ ئہ پل نا منصوبہ تیٹی کاریم کننگ و پاکستانی لشکر ٹی نوکری کننگ آن تینے تورِر۔
