کیچ : بلوچ یکجہتی کمیٹی نا نیمہ آن چار شمبے نا دے آ بلوچ نسل کُشی نا برخلاف آ ہوشاب ئٹی برانزی ریلی ئس کشنگا ۔ برانز ئٹی خوانندہ ، زالبول چُناتون اوار سد آتا کچ ئٹ بندغ آک بشخ ہرفیر ۔
برانز کروک آ بندغ آتا دُوٹی بینر و پلے کارڈ اسک پلے کارڈ آتا زی آ جتا جتاءُ نعرہ نوشتہ ئس ۔ برانز کروک آ بندغ آک زوراکی ئٹ بیگواہ و دروغ ئنا مقابلہ تیٹی زوراکی ئٹ بیگواہ بندغ آتا ناحق خلنگ نا برخلاف نعرہ خلکُر ۔
برانزیک سرکار و بندغی حق آتا ادارہ تیان خواست کرِسا پاریر کہ بلوچستان ئٹی زوراکی ئٹ بیگواہ مروکا کُل بندغ آتے آجو کننگ مرے ، زوراکی ئٹ بیگواہی و دروغ ئنا مقابلہ تیٹی زوراکی ئٹ بندغ آتا ناحق خلنگ بند کننگ مرے ۔
دا برانزی ریلی ہمو برانزی ریلی تہ بشخ ءِ ہرافک بلوچستان نا کُنڈ کُنڈ آ برجاء ءُ ۔ بلوچ یکجہتی کمیٹی نا نیمہ آن بلوچستان ئٹی ریاستی زوراکی نا برخلاف اسلام آباد پریس کلب نا مونا برجاء انگا برانز ختم کننگا و کاروان شال آ بننگءِ ۔
