بلوچ راج ئنا پنی آ چاگڑدی رہنماء و بیگواہ غا بندغ آتا آجوئی کن جدوجہد نا چیدہ ماما قدیر بلوچ ئے اونا علاقہ سوراب ئٹی دفن کننگا۔ دفن کننگ نا وخت آ چاگڑدی کاریم کروک، قبائلی رہشون، زالبول و لس مخلوق نا بھلو کچ ئس اوار مسک۔
ماما قدیر بلوچ نا کذیت ئے بلوچ راج، خاص وڑ ئٹ بیگواہ غا بندغ آتا خاہوت آتیکن بھلو ویل ئس تکّنگانے۔ اوار مروک آتا رد ئٹ ماما قدیر بلوچ زوراکی ئٹ بیگواہ کننگوک آتیکن اسہ سبر و سوگو ءُ توار ئس اسک، اونا کذیت آن ہزار آ خاہوت آک مسنو، ہرافتا بندغ آک اینو اسکان بیگواہ ءُ۔
جنازہ ٹی اوار مروک آک ہیت کرِسہ پاریر کہ ماما قدیر بلوچ 6000 دے اسکان تاریخی برانز ئس کرے و کوئٹہ غان کراچی، کراچی آن اسلام آباد اسکان بھلن و صبر خواہوکو لانگ مارچ ئس کرِسہ جہانی رد ئٹ بلوچ لس مخلوق نا مسئلہ غاتے مونا ہیس۔
اوفک مُستی قول کرِسہ پاریر کہ ماما قدیر بلوچ ئے استان دپرون و اونا جدوجہد برجاء تِخنگو۔
بندغی حق آتیکن کاریم کروک آک ہم ماما قدیر بلوچ نا قربانی و خزمت آتے دروت ندر کرِسہ پاریر کہ اونا جدوجہد ئے ساندہ بلوچ لس مخلوق نا جنز ئٹی یاد تِخِنگو۔
