بلوچ نیشنل مومنٹ (بی این ایم) نا چیئرمین ڈاکٹر نسیم بلوچ تینا شنگ کروک بیان ئٹی پارینے کہ ای ماما قدیر نا کذیت نا حال ئے بننگ تون کنا است بھاز ہسون مَس۔ او بلوچستان نا جَت پَت، سگ و بندغی حق آتا اسہ وڑ برجاء جہد ئنا چیدہ اسک۔ شانزدہ سال اسکان اسہ بین گدان ئس برجاء تخاسُس و تینا زاتی خواہِش آتے زوراکی ئٹ بیگواہی و ریاستی زوراکی تا برخلاف جہد ئٹی سدخہ کرے۔
مُستی پارے کہ ماما قدیر بلوچ کم آن کم 2500 کلومیٹر نا مرغن انگا پند روانک ئس شال آن کراچی و کراچی آن اسلام آباد اسکان کرے۔ او جہان ئے توار و کیہی زوراکی ئٹ بیگواہ کننگوک بندغ آتا خاہوت آتا رنج ئے نشان تِس۔ پیرانسری، ریاستی زوراکی، ناجوڑی تیان بیدس ہم زوراکی ئٹ بیگواہ کننگوک آتا خاہوت آتے الیتو۔
ڈاکٹر نسیم بلوچ پارے کہ اونا بیرانی بلوچ راج ئکن، انصاف، شرف و بندغی حق آتا توار آتیکن سخت ءُ دڑد ئس ءِ۔ ماما قدیر ئے بیرہ لوز آتیئٹ دروت ندر کننگ مفک بلکن اونا جہد ئے سوگو تخوئی ءِ۔ داسہ ننا کُل ئنا ذمہ واری ئے کہ اونا جہد ئے برجاء تخن۔ زوراکی ئٹ بیگواہی تا برخلاف توار ہَرفِن و انصاف خواہوک آتیتون اوار مرین۔
ڈاکٹر نسیم بلوچ ایسر ئٹی پارینے کہ خدا اونا روح ئے آسودہ کے و اونا جہد برجاء مرے۔
