بلوچ نیشنل موومنٹ (بی این ایم) نا ترجمان میڈیا ٹی شنگ کروک تینا بیان ئسیٹی پارینے کہ ماما قدیر نا کذیت نا دروشم ئٹ بلوچ قوم اسہ عظیم ءُ ہستی ئس گوہانے۔ او تینا تیبہ زندگی ئے زوراکی ئٹ بیگواہ کننگوک بندغ آتا آجوئی نا جہد ئکن ندر کرے۔ او تینا بیگواہ کننگوک آ مار جلیل ریکی نا آجوئی کن بیگواہ کننگوک بندغ آتا آجوئی نا جنز و وائس فار بلوچ مسنگ پرسنز نا برانز نا بشخ جوڑ مسک۔ جلیل ریکی ئے زوراکی ئٹ بیگواہی نا وخت آ خلنگا، ولے او زوراکی ئٹ بیگواہ کننگوک آ بندغ آتا آجوئی نا جنز آن مُر متو بلکن زیات سوگو مسک۔ او بلوچستان آن زوراکی ئٹ بیگواہ کننگوک آ بندغ آتا توار ئے جہانی پِڑ آ سَر کننگ کن بھلو کڑد ئس سَر تسّک۔
ترجمان پارے کہ او شانزدہ سال اسکان برانز کرے، پیری ٹی ناجوڑی و بے پھریزی نا خُلیس آن بیدس او ہڑدے برانزی گدان ئٹ ساڑی مسّک۔ او نہ بیرہ بلوچ راج بلکن ایلو نزور آ راج آتیکن چرجوئی ئٹ جہد کننگ نا مثیل ئس جوڑ مسّک۔ او ہزار آتا کچ بیگواہ کننگوک آ بندغ آتا خاہوت آتیکن اومیت نا چراغ ئس اسک، اونا کذیت ہندن ءُ جاگہ ئس خالی کرینے کہ او جاگہ ئے پُر کننگ کن بھلو وخت ئس بکار مرو۔ ماما قدیر ئے یات کننگ و دروت ندر کننگ اونا کاریم ئے برجاء تخنگ ءِ، نن ہندا اومیت ئے تخِنہ۔
ترجمان پارے کہ ماما قدیر بلوچ زوراکی ئٹ بیگواہ کننگوک آ بندغ و بندغی تباہی نا کنڈ آ پام تننگ کن شال آن اسلام آباد اسکان اِرا ہزار کلومیٹر مُدغُن ءُ پند ئس خلک و پند آ ہنوک آ ریلی نا بھلنی نا سوب آن بلوچستان نا زوراکی ئٹ بیگواہ انگا بندغ آتا جیڑہ ئے جہانی پڑ آ سر کرے۔ ماما قدیر بلوچ ئے بندغی و بلوچ راج ئکن خزمت کننگ آ مدام یات کننگو۔
