بلوچستان نا کاروباری شار حب چوکی آن اسہ خاہوت نا اِرا زالبول ئے پاکستانی فوج دزگیر کرسا بیگواہ کرینے، ہراڑا خاہوت و بندغی حق آتا باسک آک فریشانی نا درشانی کننگ ءُ۔
خاہوت نا رد ئٹ دا تدینی ہفتہ نا سُوب ئنا سئے بجہ غا گنجی گوٹھ ئٹی دارو ہوٹل نا علاقہ ٹی مسُنے، ہراڑے پاکستانی فوج ئنا کارندہ غاک اسہ اُراسے آ چھاپہ خلکُر و اِرا زالبول ئے تینتون دریر۔ بیگواہ کننگوک آ زالبول آتا چائنداری خیر النسا واحد ( عمر 17 سال) و ہانی ( عمر 27 سال) نا پن تیٹ مسنے۔ خاہوت نا رد ئٹ کاروائی ٹی ایف سی، سی ٹی ڈی و ڈھکوک ادارہ تا کارندہ آک اوار اسُر۔
حب چوکی ٹی زالبول آتا زوراکی ئٹ بیگواہی نا دا مُسٹمی تدینی ءِ۔ داکان مُست ہندا سال 22 نومبر آ 15 سالی آ نسرینہ بلوچ بیگواہ کننگاسس، ہندُن خضدار آن فرزانہ و دالبندین آن رحیمہ تون اوار بلوچستان نا ایلو علاقہ تیٹی ہم زالبول آتا زوراکی ئٹ بیگواہی نا تدینیک رپورٹ مسنو۔ مئی 2025 ئٹی بیگواہ کننگوک آ ماہ جبین نا بابت ئٹ ہم خاہوت نا پاننگ ءِ کہ داسکان اوفتے ہچو حوال ئس رسینگتنے۔
بندغی حق آتا باسک و خاہوت آک حکومت و ادارہ تیان زوت کاروائی و بیگواہ کننگوک آ زالبول آتا آجوئی نا خواست کرینو۔
