وائس فار بلوچ مسنگ پرسنز( VBMP) نا وائس چیئرمین و پنی آ بندغی حق آتا رہشون ماما قدیر بلوچ بھلو وخت ئسینا ناجوڑی آن پد کذیت کرے۔ دا حوال ئے وائس فار بلوچ مسنگ پرسنز نا آفیشل چینل آن پک کننگانے۔
بیان نا رد ئٹ ماما قدیر بلوچ کیہی دے آن سخت بیمار اسک و آریا اسپتال ئٹی اونا علاج مننگ ئٹی اسک، ہراڑے او اینو کذیت کرینے۔ تنظیم سخت اوسوز و ڈکُھ ئتون دا ہیت ئنا درشانی ئے کرسا پارے کہ ماما نا میت دا وخت آریا اسپتال ئٹی ساڑی ءِ و اونا تدفین سوراب ئٹی کننگ مرو۔ نماز جنازہ نا وخت و جاگہ پدا پاننگ مرور۔
ماما قدیر بلوچ بیگواہ انگا بندغ آتا جیڑہ آ اسہ بھلو توار ئس اسک۔ او کوئٹہ آن اسلام آباد اسکان پند آ لانگ مارچ نا بھلُنی ئے کرے، ہرانا مسخت زوراکی ئٹ بیگواہ کننگوک آ بندغ آتا خاہوت آتا توار ئے ایوانِ اقتدار اسکان سر کننگ اسک۔ داکان بیدس دنیا ٹی کُل آن بھاز وخت اسکان برانزی کیمپ آتیٹی اوار انگا وائس فار بلوچ مسنگ پرسنز نا کیمپ ئنا بھلو وخت ئسیکن بھلُنی ئے کرے۔
صحت نا خراب مننگ نا سوب آن ماما قدیر بلوچ داسا نا دے تیٹی برانزی کیمپ ئٹی تولنگ نا قابل الوکہ، اوکان پد اودے اسپتال آ دننگاسس،کیہی وخت علاج مننگ آن پد اینو او کذیت کرینے۔
