بی این ایم نا چیئرمین ڈاکٹر نسیم بلوچ تینا شنگ کروک بیان ئسیٹی پارے کہ بلوچ باسک ماہ زیب شفیق پاکستان نا ریاستی پالیسی تا اسہ وارس پدا نشانہ کننگانے، او تینا اِلہ راشد حسین نا سلامتی ئٹ آجوئی کن جہد کننگ اسک واہم پاکستانی لشکر اونا خاہوت نا تکلیف آتے زیات کرسا اونا باوہ شفیق زہری ئے دزگیر کرسا زوراکی ئٹ بیگواہ کرے۔
ڈاکٹر نسیم تینا بیان ئٹی مُستی پارے کہ دا زوراکی پین پوسکن ءُ تدینی ئس اف بلکن اسہ منظم ءُ حکمت عملی سینا بشخ ءِ ہراٹی ریاستی ادارہ آک اختلاف رائے ئے توننگ و انصاف نا خواست کروک آ بلوچ توار آتے بے توار کننگ کن تیبہ خاہوت آتے نشانہ کیک ہرا تینا بندغ آتا آجوئی کن توار بُڑز کیرہ گُڑا ریاست انصاف نا جاگہ آ پین جبر و بدلہ ہلِسہ خاہوت ئے پین اذیت کیک۔
ڈاکٹر نسیم بلوچ پارے کہ ماہ زیب بلوچ نا جہد ہمو بے کچ بلوچ زالبول آتا جہد ئنا رہشونی ئے کیک ہرا زوراکی ئٹ بیگواہی، تڑی و ریاستی تشدد نا برخلاف تینا خاہوت آتا اسٹ انگا توار مننگ کن مجبور ءُ۔ ہندُن راشد حسین نا سلامتی ئٹ آجوئی نا خواست ئے بننگ نا جاگہ کالخواہ ماہ زیب ئے سزا تننگ کن اونا باوہ شفیق زہری ئے زوراکی ئٹ بیگواہ کرینے۔
ڈاکٹر نسیم بلوچ پارے کہ شفیق زہری نا زوراکی ئٹ بیگواہی جہانی بندغی حق آتا قانود آتا صاف برخلافی ءِ و دا ہیت ئنا ثبوت ءِ کہ پاکستان بلوچستان ئٹی اشتماعی سزا ئے سلاہ ئسینا حساب ئٹ کارمرز کننگ ءِ۔
او ایسر ئٹ پارے کہ دا تدینی دا خرین انگا راستی نا یات تننگ ءِ کہ بلوچستان ئٹ انصاف نا خواست کننگ ہم اسہ خاہوت ئسے ہر گِڑا ئے گوئنگ کن مجبور کننگ کیک۔
