بی وائی سی نا نیمہ غان شنگ مروک بیان ئٹی تنظیمی باسک ماہ زیب بلوچ نا باوہ پروفیسر شفیق زہری نا زوراکی ئٹ بیگواہی ئے شیف خلِسہ اونا آجوئی نا خواست کننگا۔
تنظیم نا رد ئٹ حب چوکی آن پاکستانی فوج پروفیسر شفیق زہری ئے دزگیر کننگ آن پد زوراکی ئٹ بیگواہ کرے۔ پروفیسر شفیق زہری 2018 ٹی عرب امارات آن زوراکی ئٹ بیگواہ کننگوک آ راشد حسین نا بھلا ایلم ءِ و بی وائی سی نا باسک ماہ زیب بلوچ نا باوہ ءِ، اودے 17 دسمبر نا نیمروچ آ حب چوکی آن اونا سینٹر آن بیگواہ کننگانے ہراڑے او تینا ذمہ واری تے پورو کننگ اسک۔
بیان ئٹی پاننگا کہ شفیق زہری، زہری کالج ئٹی پولیٹکل سائنس ئنا پروفیسر ئسے و اودے داکان مُست 2013 ٹی ہم زوراکی ئٹ بیگواہ کننگاسس، دا ہندا ہیت ئنا گوائی ئے ایتک کہ او بھلو وخت ئسیان ریاستی جبر و نگرانی نا نشانہ مسنے۔
تنظیم پارے کہ دا تدینی تنیا اسہ فرد ئسیتون تفوک اف بلکن ہندا ہیت ئنا لڑ ءِ ریاست ماہ زیب بلوچ و اونا تیبہ خاہوت ئے منظم وڑ ئٹ اشتماعی سزا نا گواچی کننگ ءِ، خاہوت نا اسہ فرد ئسینا بندغی حق آتیکن توار بُڑز کننگ آ ایلو سیال آتے تنک و زوراکی ئٹ بیگواہ کننگ ءُ، تانکہ تیبہ خاہوت خلیس، پریشانی نا گواچی مرسا بے توار کننگ مرے۔
اونا پاننگ اسک کہ دا وڑ ئنا عمل نہ تنیا بنیاتی بندغی حق آتا برخلاف ءِ بلکب اشتماعی سزا نا بشخ ئٹی بریک، ہراٹی اسہ فرد ئسینا سیاسی و چاگڑدی کاریم تا بیر ئے تیبہ خاہوت آن ہلنگ مریک۔
اونا پاننگ اسک کہ پروفیسر شفیق زہری نا زوراکی ئٹ بیگواہی اصل ئٹ اونا خاہوت نا بندغی حق آتا رد ئٹ جہد و اونا توار ئے توننگ نا کوشست ئسے، تانکہ اونا خاہوت تینا بندغ آتا آجوئی و زوراکی ئٹ بیگواہی تا برخلاف جہد ئے یلہ تننگ کن مجبور مرے۔
بی وائی سی تینا بیان ئٹی مُستی پارے کہ ریاستی ادارہ تا نیمہ غان دا وڑ ئنا ہیلہ دا ہیت ئنا گوائی ءِ کہ اختلاف رائے، پُر ایمن و بندغی حق آتیکن توار بُڑز کروک آتے بدلہ نا گواچی کننگ ءُ او ہرا ہم مہذب و جمہوری چاگڑد ئسیکن ناقابل قبول ءِ۔
