بی ایل ایف نا سربراہ و بلوچ رہشون ڈاکٹر اللہ نذر بلوچ نا بی ایل ایف نا نیمہ غان شنگ مروک بیان ئسیٹی پاننگانے کہ چین براہ راست بلوچ سرزمین، ساحلی پٹی و قدرتی مڈی تا لُٹ و پُل نا کوزہ گیری آ منصوبہ تیٹی پاکستان تون اوار مرسا اسہ بھلو اسٹریٹجک ردی ئس کننگ ءِ۔ بلوچ راج دا فیصلہ ئے کرینے کہ بلوچستان ئٹی راجی آجوئی آن مُست ہچو منصوبہ ئس پائیدار و قابل قبول مننگ کپک، او ہرا ہم دروشم و ہرا ہم ریاست نا نیمہ غان مرے۔ تاریخ دا ہیت ئنا شاہد ءِ کہ طاقت ئٹ بناء کروکا منصوبہ آک نہ تنیا بے سوب مریرہ بلکن بھلو وخت ئسیکن بے بیسہی ودی کیرہ۔
بلوچ رہشون تینا بیان ئٹی مُستی پارے کہ پاکستان ہنوکا بیست سال آن بلوچستان ئٹی منظم نسل کشی و جنگی ڈوہ تیٹی اوار ءِ، پاکستان تون داخس خُڑک مرِسا چین تینے ہمو پالیسی و گامگیج تا بشخ کننگ ءِ ہرا انصاف، وقار و حق خود ارادیت نا وڑ ءُ اصول آتا برخلاف ءِ۔ ہمو اصول ہرافتیکن تینٹ چینی اُلس تینا تاریخ ئٹی بھلو و سخت ءُ جہد ئس کرینے۔ دا رد ئٹ چین ئنا بلوچستان نا بابت ئٹ داسا نا پالیسی چینی راج ئنا اخلاقی کنگالی نا نشان جوڑ مننگ ءِ۔
بلوچ رہشون پارے کہ نن پارینُن کہ بلوچ عوام چین ئے براہ راست دشمن پوہ مفک واہم پاکستان تون چرجوئی ئٹ و وے شڑط آن کُمک الم چین ئے ہمو گامگیج و عمل نا بشخ کیک ہرافتے پاکستان بلوچستان ئٹی برجاء تخانے۔ دا گامگیج تیٹی زوراکی ئٹ بیگواہی، بیدس عدالت آن کوش، مُچی نا سزا، ہندی آبادی تے بھلو کچ ئسیٹی زور ئٹ ہنپیفنگ و تیبہ چاگڑدئے تشدد و خوف ئٹ بے توار کننگ نا پالیسی اوار ءِ۔
بیان ئٹی پاننگانے کہ نوکنڈی، چاغی ٹی مروکا داسہ نا جلہو، ہراڑان چینی و ایلو غیر مُلکی کمپنیک زیمی مسُنو، اوفک دا جلہو ئے تنیہ پاکستان آ جلہو نہ بلکن پاکستان نا پیشن نا سرمایہ دار تا برخلاف بلوچ راجی رد عمل ئسینا حساب ئٹ ہُرِر۔ دا جلہو دا ہیت ئنا ثبوت ءِ کہ بلوچستان ئٹی ہرا ہم سرمایہ کاری و سرمایہ کاری نا منصوبہ آک بلوچ تحریک آجوئی تون تفوک ءُ کوزہ گیر پاکستان نا بھلنی ٹی کُل منصوبہ آک بلوچ راج ئنا شہہ رغ آ کتار ئس تخنگ ءِ، ہرافتیا مزاحمت فطری ہیت ئسے۔
بلوچ رہشون پارے کہ نن چینی قیادت آ زور شاغِنہ کہ او پاکستان نا حوالہ ئٹ خاص بلوچستان نا رد ئٹ تینا پالیسی تے سنجیدگی ئٹ ہُرے و ہندی ( اِنڈیجینس) بلوچ آبادی نا سیاسی، مالی و راجی خواست آتے نظر انداز کننگ نا جاگہ ترجیح ایتے۔
بلوچ رہشون و بی ایل ایف نا سربراہ ڈاکٹر اللہ نذر نا بیان نا ایسر ئٹ پاننگا کہ ہندا کلہو یورپ، امریہ مشرقِ وسطیٰ نا کُل ملک آتیکن ءِ۔ او پارے کہ نن جہانی مخلوق آن خواست کینہ کہ اوفک بلوچ اُلس نا آجوئی نا جائز جہد ئے منّیر و اونا مُختفی کن تعمیری و ذمہ دار او کڑدار ادا کیر۔ مستقبل نا آزاد بلوچستان دا کُل ملک آتیکن اسہ صاف، ذمہ وار و باوقار بشخدار ئس مرو ہرا آجوئی، انصاف و بندغی وقار نا بنیاتی اصول آتا احترام ئے کیک۔
