بی ایل ایف نا ترجمان میجر گہرام بلوچ میڈیا ٹی شنگ کروک بیان ئسیٹی پارے کہ ننا سرمچار آک 15 دسمبر آ مند ئنا علاقہ ردیگ و مہیر نا نیام ئٹی کوزہ کروک لشکر نا کاروان ئے سیکیورٹی تروکا لشکری کارندہ تے آئی ای ڈی جلہو ئٹی نشانہ کریر۔ دا جلہو ئٹی نائیک غلام فرید تون اوار اِرا فوجی کارندہ ہمو جاگہ غا کھسکُر۔
ترجمان پارے کہ اسہ پین کاروائی سیٹی 15 دسمبر نا شام ئنا 6 بجہ غا آواران آن گیشکور آ ہنوکا کوزہ کروک پاکستانی لشکر نا کاروان آ زیک ئنا خُڑک واسطی بازار ئٹی سرمچار آک سنگر ہلِسہ جلہو کریر۔ کاروان ئٹی اوار مُسہ لاریک جلہو نا مون ئٹی بسُر، ہرافتیٹ اسہ لاری ئسے بھاز نُسخان رسینگا۔ دا لاری ٹی سوار پنچ انگا کارندہ غاک خلنگار و اِرٹ ٹپی مسر و اِرا لاری تیٹی سوار کارندہ غاک نرّار۔
ترجمان پارے کہ 15 دسمبر نا شام ئنا 8 بجہ غا سرمچار آک تربت اوورسیز کسر آ نیوی فورس ئنا چیک پوسٹ آ برجاء انگا مورچہ غا چغلی بمب ئٹ جلہو کریر ہراٹی مورچہ ٹی ساڑی کارندہ ئس ٹپی مس۔
ترجمان گہرام بلوچ مُستی پارے کہ سرمچار آک 14 دسمبر نا شام مشکے نا علاقہ پتندر ئٹی اسہ مشن ئسیکن ہننگ ئٹی اسُر کہ کوزہ کروک لشکر نا نیمہ غان بال تِروک مُسہ کواڈ کاپٹر سرمچار تا ہن ئہ بر نا نگرانی و اوفتے نشانہ کننگ نا کوشست کننگ ئٹی اسُر۔ سرمچار آک مُست کاروائی کرسا کواڈ کاپٹر ئس خلکُر و سلامتی ئٹ تینا رکھوک ٹھکانہ تیا سر مسُر۔
ترجمان گہرام بلوچ ایسر ئٹ پارے کہ بی ایل ایف مند، آواران، تربت و مشکے ٹی مروکا چھار کاروائی تیٹی ہفت فوجی کارندہ ئے خلنگ و اسہ کواڈ کاپٹر ئس بِٹنگ نا ذمہ واری ئے ہرفِک۔
