بلوچستان ئٹی زوراکی ئٹ بیگواہی تا تدینیک گیشتر مسنو، اسہ پین تدینی سیٹی خضدار آن زالبول ئسے زوراکی ئٹ بیگواہ کننگانے۔ بی این ایم نا بندغی حق آتا ادارہ پانک ئنا رد ئٹ فرزانہ زہری بنت محمد بخش زہری ئے اسِہ دسمبر 2025 نا شام خضدار آن ہمو وخت زوراکی ئٹ بیگواہ کریر ہراتم او اسپتال آن واپس اُراغا بننگ اسک۔
تنظیم نا رد ئٹ تدینی آن پد فرزانہ زہری نا بابت ئٹ ہچو ڈس ئس اف و کالخواہ تا نیمہ غان داسکان دزگیری یا قانودی جواز مونا ہتنگ متنے۔ پانک ئنا رد ئٹ زیمی مروکا خاہوت داسا زہری آن ہمپِسہ خضدار آ بسُنے، واہم اوفتے نشانہ کننگانے۔
پانک دا تدینی ئے زوراکی ئٹ بیگواہی ئس پارسا جہانی بندغی حق آتا برخلاف پارینے۔ بندغی حق آتا باسک آتا رد ئٹ ہندا سال بلوچستان ئٹی زالبول آتا زوراکی ئٹ بیگواہی نا کیہی تدینیک رپورٹ مسنو، ہرا پریشانی نا رجحان نا نشاندہی کیک۔
رپورٹ آتا رد ئٹ ہندا سال کوئٹہ آن ماہ جبین، حب چوکی آن نسرینہ، دالبندین آن رحیمہ و خضدار آن فرزانہ زہری نا زوراکی ئٹ بیگواہی نا تدینیک مونا بسنو۔ بندغی حق آتا تنظیم آتا رد ئٹ دا کُل بندغ آک پاکستانی فوج ئنا دزگیر ٹی ءُ۔
پانک ئنا رد ئٹ فرزانہ زہری تون اوار کُل بیگواہ کننگوک آ بندغ آتا سلامتی نا ذمہ دار ریاست و اونا ادارہ آک ءُ۔ پانک خواست کرے کہ بیگواہ کننگوک نیاڑی تے زوت عدالت آتیٹی ہتنگ مرے یا آجو کننگ مریر۔ تنظیم راجی و جہانی بندغی حق آتا ادارہ، اقوام متحدہ و جہانی مخلوق آن خواست کرینے کہ اوفک بلوچستان ئٹی زوراکی ئٹ بیگواہی و بندغی حق آتا برخلافی تا سنجیدگی ئٹ نوٹس ئے ہلیر۔
