بلوچستان لبریشن فرنٹ نا ترجمان میجر گہرام بلوچ تینا شنگ کروک بیان ئٹ پارے کہ بی ایل ایف نا سرمچارک 7 دسمبر آ ننکان خُڑکیکا 9 ئہ 10 منٹ آ تنظیم نا ڈھکوک وِنگ آن رسینگوک حوال آ دمدستی بنداو آ کاروائی کرسا ڈیتھ اسکواڈ نا کارندہ غاتا اسہ گاڑی ئسے کوئٹہ، سریاب نا علاقہ کَلی کمالو ٹی ٹک کریر۔ جلہو ئٹ ڈیتھ اسکواڈ نا اسہ اہمو کارندہ ئس، مزمل زہری ولد میر سلیم زہری مرگ ئنا گواچی، و اِرٹ پین ٹپی مسُر۔
او پارے کہ مزمل زہری کوئٹہ و ہیب ئہ کھیب ئنا ورنا تا زوراکی نا بیگواہی و جتا چاگڑدی گندئی تیٹ تُد اسک۔ مرگ ئنا گواچی مننگ آن مُست او پسند خان محمددزئی نا اُراغان پیشتماسس، ہراڑان گڈ سرمچارک اودے ٹک کریر۔ پسند خان محمدزئی ولد مراد خان و مزمل زہری، بلوچستان ئٹ ڈیتھ اسکواڈ نا بنجائی کڑد، شفیق مینگل نا بھلنی ٹی کاریم کرینو۔
اونا ودیک پاننگ اسک کہ بلوچستان لبریشن فرنٹ نا سرمچارک 9 دسمبر آ ننکان 10:00 بجہ نا وختا واشک نا علاقہ ناگ ئٹ اسہ پولیس تھانہ ئسے گھیرہ کرسا ڈیوٹی آ ساڑی کارندہ غاتے دزگیر کریر۔ پٹ ئہ پول نا وختا تھانہ آن ہچو سلاہ دو بتو، ولے تنظیم نا انٹیلیجنس وِنگ ئنا تروک خاص حوال آ سرمچارک تھانہ نا انچارج نا اُراغا چھاپہ خلکُر ہراکان ڈھکوکا سرکاری سلاک دو بسُر۔ سرمچارک دو بروکا غُٹ سرکاری سلاہ تے ضبط کریر واہم کارروائی نا ایسر ئٹ غُٹ پولیس کارندہ غاتے یلہ کننگا۔
میجر گہرام پارے کہ اسہ پین کاروائی ئسیٹی بلوچستان لبریشن فرنٹ نا سرمچارک 9 دسمبر آ ننکان 8:30 نا وختا بالگتر نا علاقہ سہاکی ٹی ساڑی اسہ فوجی کیمپ ئسے آ جلہو کریر۔ سرمچارک اِرا جتاؤ کنڈ آن بھلا سلاہ تیٹ کیمپ ئے ٹک کریر۔ کوزہ گیر ریاستی لشکر دودیئا وڑ ئٹ ورندی کاروائی ٹی سول آبادی ئے ٹک کرے و کیہی مارٹر گولہ خسا۔
او بیان نا ایسر ئٹ پارے کہ بلوچستان لبریشن فرنٹ کوئٹہ، واشک و بالگتر ئٹ فوج، ڈیتھ اسکواڈ و پولیس ئے ٹک کننگ نا ذمہ واری ئے ہرفک۔
