بی ایل ایف نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ تنظیم نا خاص دستہ” سدو آپریشنل بٹالین (سوب)” نا سرمچارک 30 نومبر نا شام ئنا 8:19 منٹ آ نوکنڈی ٹی کوزہ گیر پاکستانی فوج ئنا بریگیڈ ہیڈ کوارٹر آ جلہو کرسا تہٹی پیہار۔ سرمچارک سیندک و ریکوڈک ئٹی گولڈ و کاپر نا خُتنگ کن کوزہ گیری منصوبہ تون تفوک ڈنی ملک آتا نوکر، عملہ و انجینیئر تا دفتر و رہینگوکا کیمپ ئنا نیام ئٹی جوڑ مروک کمپاؤنڈ آ کوزہ کریر۔
ترجمان پارے کہ دا کاروائی ئٹ بی ایل ایف جہانی مخلوق آ پاش کیک کہ بلوچستان اسہ کوزہ مروکو علاقہ ئسے و بلوچ قوم تینا ڈیہہ ئنا آجوئی کن جہد کننگ ءِ۔ بلوچ قوم ئے آجوئی نا دا جہد ئٹی کوزہ گیر ریاست نا دو آن سخت نسل کشی و کوزہ گیری نا جبر ئتون مون تروئی تمنگ ءِ۔ محکوم انگا راج آتا حق آجوئی و خودمختاری نا رد ئٹ اقوام متحدہ نا چارٹر و قرارداد، جہانی قانود، بندغی حق آتا جہانی منشور و اصول آتا رد ئٹ بلوچ قوم دا ہیت ئنا حق دار ءِ کہ جہانی مخلوق و ادارہ آک بلوچ راجی آجوئی نا مُخ تفی ئے کیر۔جہانی مخلوق بلوچستان ئٹی زوراکی ئٹ بیگواہی، بیدس عدالت کوش، سیاسی و بندغی حق آتا لتاڑنگ و بد انگا نوآبادیاتی کوزہ، لُٹ ءُ پُل و جنگی ڈوھ تا کروک کوزہ گیر ریاست پاکستان، اونا فوج و ڈھکوک ایجنسی تا احتساب ئے کیر۔
ترجمان بیان ئٹ پارے کہ بلوچستان نا علاقہ ریکوڈک و سیندک ئٹ کاپر اینڈ گولڈ پراجیکٹس چین۔ پاکستان اقتصادی رہداری( سی پیک) نا وڑ انگا منصوبہ آک بلوچ راجی مڈی تا نوآبادیاتی لُٹ و پول نا منصوبہ آکو۔ دُن انگا منصوبہ آک نہ تنیا مالی جبر ئنا ذریعہ ءُ بلکن راجی محکومی نا نشانی ءُ۔ ریاست پاکستان ننا سرزمین، قدرتی وسائل و حق آتا زوراکی ئٹ کوزہ ئے برجاء تخانے۔بلوچستان نا معدنیات، مش، سمندر، دریا و وسائل تے پاکستان نا غاصبانہ کوزہ و اوفتے نیلام کننگ نا نو آبادیاتی عمل جہانی قانود و پروٹوکولز تا خلاف ورزی ءِ۔ ریکوڈک و سیندک ئٹی خیسُن و تانبہ تا خُتنگ و سی پیک نوآبادیاتی استحصال نا منصوبہ ءُ۔
دا منصوبہ ٹی بلوچ قوم و بلوچستان نا ترقی پاننگ سراسر دروغ ئسے ۔ دا منصوبہ ننا مڈی تیا کوزہ و لٹ و پُل کننگ نا دروشم ئسے ۔
مُستی پارے کہ نن واضح کینہ کہ بلوچستان نا مڈی تا ہُننگ اوفتا کارمز کننگ غیر ملکی کمپنی تے اوار کننگ نا معاہدہ بیرہ آزاد بلوچستان کیک ۔ کوزہ گیر پاکستان و اونا دلار آک بلوچستان نا زمینی و دریائی مڈی تے کارمُز کننگ نا ھچو قانونی و اخلاقی حق ئس تخننگ افس ۔ نن غیر ملکی کمپنی تیتون اوار پاکستان و اونا جہی آلہ کار تیتون ھچو معاہدہ و شرکت داری کن بلوچ قوم ئنا رضامندی ئے منّوفن ۔ بلوچستان و اونا مڈی تا اصل مالک بلوچ قوم ءِ ۔ بلوچستان ئٹی سرمایہ کاری نا خواہش کروک ارا کمپنیک بلوچستان نا مڈی تے ہُروک و استحصال ئٹی پاکستان تون شرکت داری نا معاہدہ کیرہ او تینے اسہ سْیاسی تنازعہ ئسینا گواچی کیرہ، دون انگا معاہدہ تا ھچو قانونی و اخلاقی جواز و حیثیت ئس اف ۔
او پارے کہ نن اصولی وڑ ئٹ پڑو کینہ کہ بلوچ قوم بلوچستان آ پاکستان نا زوراکی ئٹ کوزہ کننگ و اونا مڈی تا لٹ و پُل کننگ نا استحصالی پالیسی تے منّوفن ۔ بلوچ و پاکستان نا نیام ئٹ دا تنازع نا حل آزاد بلوچستان ءِ ۔ بلوچستان و اونا مڈی تا مالک بلوچ قوم ءِ ، و فیصلہ کننگ نا حق و اختیار ہم بلوچ قوم ئنا ءِ۔
ترجمان پارے کہ نن دا واضح کینہ کہ کیہی عناصر نا پروپگنڈا نا برعکس بلوچستان نا آزادی نا خواست ھچو جزباتی نعرہ، دہشتگردی و مہم جوئی ئس اف بلکن بلوچ قوم ئنا شعوری فیصلہ و قومی ، تاریخی ، قانونی و فطری حق ئسے ۔ و دا حق ئنا جہد ئٹی اوار مننگ ہر اسہ بلوچ نا قومی ذمہ واری ءِ۔
او پارے کہ اقوام متحدہ نا چارٹر تون اوار جہانی قوم تیٹی دا اصول تسلیم ءِ کہ ہر قوم ئے تینا آزادی و اقتدار اعلی نا حق ارے ۔ بلوچ قوم ہندا تسلیم کروک قانونی و فطری حق ءِ ہلنگ خوہک ۔ و دا خطہ ٹی امن ، استحکام و ترقی نا اولی کسر ءِ ۔
ایسر ئٹ پارے کہ بلوچستان لبریشن فرنٹ بلوچ قوم ئنا اواری ئٹ بلوچستان نا آزادی کن ہر وڑ ئنا قربانی کن پُر عزم و تیار ءِ۔
